Ҳафталик савдо айланмаси 7,1 млрд. сўмни ташкил қилди
2018 йилнинг 17 - 21 декабрь кунлари “Тошкент” Республика фонд биржаси савдоларида 32 та акциядорлик жамиятининг қимматли қоғозлари билан 223 та битим қайд қилиниб, 10,2 млн. дона оддий ва 0,7 млн. дона имтиёзли корпоратив акциялар 7,1 млрд. сўмга сотилди.
Корпоратив акциялар билан ўртача кунлик савдо айланмаси ҳисобот даврида 1,4 млрд. сўмни, ўртача битим қиймати эса 32,0 млн. сўмни ташкил этди. Шу билан бирга, ушбу даврда сотилган бир дона акциянинг ўртача нарх кўрсаткичи 659,5 сўмдан иборат бўлди. Ҳисобот даврининг ҳар бир кунига 2,2 млн. дона корпоратив акциялар олди-сотдиси тўғри келди.
Таҳлиллар жами савдо айланмасининг 93,5 фоизи (6,7 млрд. сўм) тижорат банклари ва 1,2 фоизи (85,5 млн. сўм) қурилиш материаллари тармоғига мансуб жамиятларнинг қимматли қоғозлари билан амалга оширилган битимлардан иборат бўлганини кўрсатди. Ҳафта давомида “Davr-bank” ХАТБнинг 668 минг дона оддий акцияси билан 3,3 млрд. сўм (ҳафталик савдо айланмасининг 46,7 фоизи) миқдорида 1 та савдо битими тузилиб, бир дона акциянинг сотув нархи номиналига мос равищда 5 000 сўмни ташкил қилди.
Битимлар сони бўйича етакчиликни ўтган ҳафтада “Qizilqumsement” АЖ эгаллаган ҳолда, унинг 14 минг дона акцияси билан 22 млн. сўмлик 64 та битим амалга оширилди. Ундан кейинги ўринларни эса АТБ “Hamkorbank” (23 та битим) ва “Kvarts” АЖ (22 та битим) эгаллади.
Ўтган ҳафтада инвесторлар тоифасига кўра биржа савдоларида жисмоний шахслар фаоллиги кузатилиб, тузилган умумий битимлар ҳажмининг – 88,7 фоизи (6,3 млрд. сўм), битимлар сонининг эса – 88,8 фоизи (198 та битим) айнан улар ҳиссасига тўғри келди.
Шунингдек, ўтган ҳафтада фонд биржасида республикамизнинг 7 та ҳудудида жойлашган листинг компаниялари қимматли қоғозлари билан савдо битимлари имзоланди. Биржа битимларининг энг юқори ҳажми Тошкент шаҳри (63,9 фоиз) ва Фарғона вилоятидаги (34,7 фоиз) акциядорлик жамиятлари ҳисобига тўғри келди.
Фонд биржасида йил бошидан буён 662,3 млрд. сўмлик 10 318 та савдо битими қайд қилинди. Ушбу даврда биржа савдоларида 117 та акциядорлик жамиятининг 10,1 млрд. дона корпоратив қимматли қоғозлари сотилган.