2018 йилнинг 5 – 9 ноябрь кунлари “Тошкент” Республика фонд биржаси савдоларида 32 та акциядорлик жамиятининг қимматли қоғозлари билан 250 та битим қайд қилиниб, 567,2 млн. дона акциялар 12,4 млрд. сўмга сотилди.

Таҳлиллар жами савдо айланмасининг 85,9 фоизи (10,6 млрд. сўм) тижорат банкларининг ҳамда 4,5 фоизи (0,55 млрд. сўм) қурилиш материаллари тармоғига мансуб жамиятлар қимматли қоғозлари билан амалга оширилган битимлардан иборат бўлганини кўрсатди.

Қимматли қоғозлар билан ўртача кунлик савдо айланмаси ҳисобот даврида 2,5 млрд. сўмни, ўртача битим қиймати эса 49,5 млн. сўмни ташкил этди. Шу билан бирга, ушбу даврда сотилган бир дона акциянинг ўртача нарх кўрсаткичи 21,8 сўмдан иборат бўлди. 

Энг йирик битим 5 ноябрь санасида “Main Board” асосий секциясида  “Ravnaq-bank” ХАТБнинг 8,0 млн. дона оддий акцияси билан 8,0 млрд. сўм миқдорида тузилди. Бир дона акциянинг сотув кунидаги нархи номиналига мос равишда 1 000 сўмни ташкил қилди.

Битимлар сони бўйича етакчиликни ўтган ҳафтада “Kvarts” АЖ эгаллаган ҳолда,  унинг 26,4 минг дона акцияси билан 140,1 млн. сўмлик 87 та битим амалга оширилди. Ундан кейинги ўринларни эса “Qizilqumsement” АЖ (34 та битим) ва “O'zsanoatqurilishbank” AТБ (27 та битим) эгаллади.

Ўтган ҳафтада инвесторлар тоифасига кўра биржа савдоларида юридик шахслар фаоллиги кузатилиб, тузилган умумий битимлар ҳажмининг – 60,6 фоизи (7,5 млрд. сўм), битимлар сони бўйича эса – 21,2 фоизи (53 дона) айнан улар ҳиссасига тўғри келди.

Шунингдек, ўтган ҳафтада фонд биржасида республикамизнинг 9 та ҳудудида жойлашган листинг компаниялари қимматли қоғозлари билан савдо битимлари имзоланди. Биржа битимларининг энг юқори ҳажми Тошкент шаҳри ва (81,6 фоиз) ва Фарғона вилоятидаги (12,9 фоиз) акциядорлик жамиятлари ҳисобига тўғри келди.

Фонд биржасида йил бошидан буён 553,5 млрд. сўмлик 8 839 та савдо битими қайд қилинди. Ушбу даврда биржа савдоларида 115 та акциядорлик жамиятининг 8,46 млрд. дона қимматли қоғозлари сотилган.

Йил бошидан буён биржа савдо айланмасида тижорат банкларининг қимматли қоғозлари билан амалга оширилган битимлар ҳажми юқорилигича қолмоқда. Тижорат банкларининг умумий савдо айланмасидаги улуши 85,6% ёки 473,5 млрд. сўмни ташкил қилади.