2018 йилнинг 2 – 5 октябрь
кунлари «Тошкент» Республика фонд биржаси савдоларида 27 та акциядорлик
жамиятининг акциялари билан 180 та битим қайд қилиниб, 69,8 млн. дона акциялар 85,0 млрд. сўмга сотилди. Ушбу
кўрсаткич биржа тарихидаги ҳафта давомида қайд қилинган энг юқори даражадаги савдо
айланмаларидан бири ҳисобланади.
«Тошкент» РФБ тарихида ҳафталик рекорд кўрсаткич 2017 йилда қайд
қилинган бўлиб, 2017 йилнинг 27 ноябрь – 1 декабрь оралиғида биржа умумий савдо
айланмаси ҳажми 148,5 млрд. сўмни ташкил этган эди. Энг юқори кўрсаткич бўйича
кейинги натижа эса 2016 йилнинг 26 – 30 декабрь кунлари тузилган 38,7 млрд.
сўмлик ҳафталик савдо битимларидан иборат бўлган.
Қимматли қоғозлар билан ўртача кунлик савдо айланмаси ҳисобот даврида 21,1 млрд. сўмни, ўртача битим қиймати эса 472,3 млн. сўмни ташкил этди. Шу билан бирга, ушбу даврда
сотилган бир дона акциянинг ўртача нарх кўрсаткичи 1 218,0 сўмдан иборат бўлди.
Таҳлиллар жами савдо айланмасининг 99,5 фоизи тижорат банкларининг қимматли
қоғозлари билан амалга оширилган битимлардан иборат бўлганини кўрсатди. Ҳафта
давомида “Trastbank” ХАБнинг 59,7 млн. дона оддий
акцияси билан 81,1 млрд. сўм (ҳафталик савдо айланмасининг 95,4 фоизи) миқдорида
74 та савдо битими тузилиб, бир дона акциянинг сотув нархи 1 359,52 сўмни
ташкил қилди.
Битимлар сони бўйича етакчиликни ўтган ҳафтада “Trastbank” ХАБ эгаллади (74 та
битим). Ундан кейинги ўринларни эса “Kogon yog'-ekstraktsiya zavodi” АЖ (21 та
битим) ва “Andijon tajriba-sinov zavodi” АЖ (15 та битим) эгаллади.
Ўтган ҳафтада инвесторлар тоифасига кўра биржа савдоларида жисмоний шахслар фаоллиги кузатилиб,
тузилган умумий битимлар ҳажмининг – 61,9 фоизи (56,6 млрд. сўм), битимлар сони бўйича эса – 72,2
фоизи (130 дона) айнан улар ҳиссасига тўғри келди.
Шунингдек, ўтган ҳафтада фонд биржасида республикамизнинг 7 та ҳудудида
жойлашган листинг компаниялари қимматли қоғозлари билан савдо битимлари
имзоланди. Биржа битимларининг энг юқори ҳажми Тошкент шаҳридаги (99,5 фоиз) акциядорлик
жамиятлари ҳисобига тўғри келди. Тузилган битимлар сони бўйича эса Тошкент
шаҳри (52,2 фоиз) ва Бухоро вилоятлари (17,2 фоиз) етакчилик қилди.
Фонд биржасида йил бошидан буён 414,8 млрд. сўмлик 7 973 та савдо
битими қайд қилинди. Ушбу даврда биржа савдоларида 113 та акциядорлик жамиятининг
7,4 млрд. дона қимматли қоғозлари сотилган.