«Тошкент» РФБ хабарлари
2018 йилнинг 24 – 28 сентябр кунлари «Тошкент» Республика фонд биржаси савдоларида 19 та акциядорлик жамиятининг қимматли қоғозлари билан 113 та битим қайд қилиниб, 22,0 млн. дона акция билан 22,4 млрд. сўмлик битим амалга оширилди. Ҳафта якунлари кўра USI индекс кўрсаткичи 1 060.51 (▲1.19) пунктни ташкил этди.
Таҳлиллар жами савдо айланмасининг 96,9 фоизи тижорат банкларининг қимматли қоғозлари билан амалга оширилган битимлардан иборат бўлганини кўрсатди. Энг йирик битим 26 - сентябр санасида асосий секцияда «Turkiston» ХАТБнинг 7,1 млн. дона акцияси билан 7,1 млрд. сўм миқдорида тузилди. Бир дона акциянинг сотув нархи 1000 сўмни ташкил қилди.
Битимлар сони бўйича етакчиликни ўтган ҳафтада «Kvarts» АЖ эгаллаган ҳолда, унинг 154,4 минг дона акцияси билан 86,8 млн. сўмлик 38 та битим амалга оширилди.
Қимматли қоғозлар билан ўртача кунлик савдо айланмаси ҳисобот даврида 4,5 млрд. сўмни, ўртача битим қиймати эса 197,8 млн. сўмни ташкил этди. Шу билан бирга, ушбу даврда сотилган бир дона акциянинг ўртача нарх кўрсаткичи 1 016,9 сўмдан иборат бўлди.
Қимматли қоғозларнинг номинал нархига нисбатан юқори даражадаги фарқ «Andijon tajriba-sinov zavodi» АЖ акциялари билан тузилган савдо битимларида кузатилди. Бунда номинал қиймати 1 000 сўм бўлган жамият акцияларининг савдо кунидаги биржа нархи 10 000 сўмни ташкил этди.
Ҳафта давомида савдо айланмаси ҳажми юқори бўлган эмитентларни «Turkiston» XATБ (ҳафталик савдо айланмасининг – 66,1 фоизи), «Ravnaq-bank» XATБ (28,5 фоиз), «O'zRTXB» АЖ (2,4 фоиз) ва XATБ «Universal bank» (2,2 фоиз) ташкил этди. Савдо айланмасининг 99,2 фоизи улар ҳиссасини ташкил этди.
Ўтган ҳафтада инвесторлар тоифасига кўра биржа савдоларида жисмоний шахслар фаоллиги кузатилиб, тузилган умумий битимлар ҳажмининг – 97,2 фоизи (21,7 млрд. сўм), битимлар сонининг эса – 72,6 фоизи (82 та битим) айнан улар ҳиссасига тўғри келди.
Шунингдек, ўтган ҳафтада фонд биржасида республикамизнинг 6 та ҳудудида жойлашган листинг компаниялари қимматли қоғозлари билан савдо битимлари имзоланди. Биржа битимларининг энг юқори ҳажми Тошкент шаҳри (97,0 фоиз) ва Фарғона вилоятидаги (2,7 фоиз) акциядорлик жамиятлари ҳисобига тўғри келди.
Фонд биржасида йил бошидан буён 329,8 млрд. сўмлик 7 793 та савдо битими қайд қилинди. Ушбу даврда биржа савдоларида 113 та акциядорлик жамиятининг 7,3 млрд. дона қимматли қоғозлари сотилган.
