Биржа хабарлари
2018 йилнинг 27 - 30 август кунлари «Тошкент» Республика фонд биржаси савдоларида 17 та акциядорлик жамиятининг қимматли қоғозлари билан 62 та битим қайд қилиниб, 22,1 млн. дона акция 23,5 млрд. сўмлик битим амалга оширилди.
Таҳлиллар жами савдо айланмасининг 68.1 фоизи банклар ва 29.7 фоизи ишлаб чиқариш компанияларининг қимматли қоғозлари билан амалга оширилган битимлардан иборат бўлганини кўрсатди.
Энг йирик битим 28 август санасида асосий секцияда «Madad Invest Bank» АТБнинг 900 минг дона акцияси билан 4.5 млрд. сўм миқдорида тузилди. Бир дона акциянинг сотув нархи 5 000 сўмни ташкил қилди.
Битимлар сони бўйича етакчиликни ўтган ҳафтада «Kvarts» АЖ эгаллаган ҳолда, унинг 982 дона акцияси билан 5.2 млн. сўмлик 13 та битим амалга оширилди.
Қимматли қоғозлар билан ўртача кунлик савдо айланмаси ҳисобот даврида 5.9 млрд. сўмни, ўртача битим қиймати эса 379.8 млн. сўмни ташкил этди. Шу билан бирга, ушбу даврда сотилган бир дона акциянинг ўртача нарх кўрсаткичи 1 063.8 сўмдан иборат бўлди.
Қимматли қоғозларнинг номинал нархига нисбатан юқори даражадаги фарқ «O'zRTXB» АЖ акциялари билан тузилган савдо битимларида кузатилди. Бунда номинал қиймати 630 сўм бўлган жамият акцияларининг савдо кунидаги биржа нархи 5 500 сўмни ташкил этди.
Ҳафта давомида савдо айланмаси ҳажми юқори бўлган эмитентларни «Turkiston» XATБ (ҳафталик савдо айланмасининг – 45.1 фоизи), «Xorazm shakar» ҚК АЖ (29.8 фоиз), «Madad Invest Bank» АТБ (19.1 фоиз) ва АТБ «Qishloq qurilish bank» (3.7 фоиз) ташкил этди. Савдо айланмасининг 97.7 фоизи улар ҳиссасини ташкил этди.
Ўтган ҳафтада инвесторлар тоифасига кўра биржа савдоларида жисмоний шахслар фаоллиги кузатилиб, тузилган умумий битимлар ҳажмининг – 70.2 фоизи, битимлар сонининг эса – 51.6 фоизи айнан улар ҳиссасига тўғри келди.
Шунингдек, ўтган ҳафтада фонд биржасида республикамизнинг 6 та ҳудудида жойлашган листинг компаниялари қимматли қоғозлари билан савдо битимлари имзоланди. Биржа битимларининг энг юқори ҳажми Тошкент шаҳри (48.9 фоиз) ва Хоразм вилояти (26.0 фоиз) акциядорлик жамиятлари ҳисобига тўғри келди.