E'LON
28.01.2026

«O‘zsanoatqurilishbank» ATBning oddiy aksiyalari bo‘yicha savdolar tiklandi.

2026-yil 6–19-yanvar kunlari davomida «Toshkent» Respublika fond birjasining Main Board maydonchasida «O‘zsanoatqurilishbank» ATBning (UZ7037560008) oddiy aksiyalari kotirovkalarining sezilarli darajada o‘sishi qayd etilgan edi.

«Toshkent» Respublika fond birjasida Qimmatli qog‘ozlar savdosi qoidalarining 1687-bandiga muvofiq, narxlarning keskin va asoslanmagan o‘zgarishi holatlarida savdolarni to‘xtatib turish nazarda tutilganligi sababli, 2026-yilning 21-yanvaridan boshlab bankning mazkur aksiyalari bo‘yicha savdolar to‘xtatilgan.

Savdo qoidalarining 1688-2-bandiga ko‘ra, Birjaning nazorat komissiyasi yuzaga kelgan bozor vaziyatini har tomonlama tahlil qildi.

Birinchi bosqichda kompleks tahlilni amalga oshirish uchun quyidagi asosiy omillar o‘rganildi:

• bank tomonidan e’lon qilingan oxirgi muhim faktlar;
• yangiliklar va axborot muhiti;
• bankning moliyaviy-iqtisodiy ko‘rsatkichlari;
• aksiyalar narxlarining so‘nggi uch yildagi tarixiy dinamikasi;
• amalga oshirilgan bitimlar parametrlari.

Savdo faoliyatini doimiy monitoring qilish doirasida Birja tomonidan «O‘zsanoatqurilishbank» ATBning oddiy aksiyalari bo‘yicha savdolarda ishtirok etgan 15 ta investitsiya vositachisi tomonidan amalga oshirilgan operatsiyalar chuqur tahlil qilindi.

Tahlil natijalariga ko‘ra, investitsiya vositachilari quyidagilarni tasdiqladi:

• savdolarning bitimlari asosan bir martalik xarakterga ega bo‘lgan;
• operatsiyalar individual investitsiya qarorlari asosida amalga oshirilgan;
• kotirovkalarning o‘sishi emitent tomonidan muhim faktlar e’lon qilinishi bilan bog‘liq bo‘lishi mumkin;
• bank sektoriga investorlar qiziqishining ortishi hamda bozordagi ijobiy kutilmalar bu jarayonni izohlaydi.

Bundan tashqari, 2026-yil 8-yanvar kuni openinfo.uz rasmiy veb-saytida O‘zbekiston Respublikasi Milliy Investitsiya jamgʻarmasi egaligiga «O‘zsanoatqurilishbank» ATBning 30% oddiy aksiyalari o'tganligi to‘g‘risida axborot e’lon qilingani aniqlandi, bu esa bozor uchun muhim omil hisoblanadi.

Savdo qoidalarining 1688-3-bandiga asosan, nazorat komissiyasi tomonidan o‘rganish natijalari va barcha holatlar inobatga olingan holda, "Toshkent" Respublika fond birjasi tomonidan «O‘zsanoatqurilishbank» ATBning (UZ7037560008) oddiy aksiyalari bo‘yicha savdolarni qayta tiklash to‘g‘risida qaror qabul qilindi.

Shu bilan birga, savdolar 2026-yil 28-yanvardan boshlab 2026-yil 20-yanvarda shakllangan yopilish narxi asosida qayta tiklandi.