2017 йилнинг 23 - 27 октябр кунлари «Тошкент» Республика фонд биржаси
савдоларида 16 та акциядорлик жамиятининг қимматли қоғозлари билан 44 та битим
қайд қилиниб, 9,4 млн. дона акция 132,3 млн. сўмга сотилди.
Таҳлиллар жами савдо айланмасининг 36,9 фоизи агросаноат тармоғидаги
акциядорлик жамиятлари ва 33,1 фоизи тижорат банкларининг қимматли қоғозлари билан амалга оширилган
битимлардан иборат бўлганини кўрсатди. Энг йирик битим 24 октябр санасида «Hamkorbank» АТБнинг 99,1 минг дона акцияси билан 15,4 млн. сўм миқдорида
тузилди.
Шунингдек, тузилган битимлар сони бўйича етакчиликни «Guliston
Ekstrakt-Yog'» АЖ эгаллаган ҳолда, ҳафта
давомида ушбу жамиятнинг 1695 дона акциялари билан 48,8 млн. сўмлик 8 та битим
амалга оширилди.
Ҳафта давомида савдо айланмаси ҳажми юқори бўлган эмитентларни «Guliston
Ekstrakt-Yog'» АЖ (ҳафталик савдо айланмасининг – 36,9 фоизи), «Hamkorbank» АТБ (26,6 фоизи) ва «Buxorogazsanoatqurilish»
АЖ (8,0 фоизи) ташкил этди. Бу ҳафталик
савдо айланмасининг 71,5 фоизини ташкил этади.
Ўтган ҳафта фонд биржасида республикамизнинг 6 та ҳудудида жойлашган
листинг компаниялари қимматли қоғозлари билан савдо битимлари имзоланди. Биржа
битимларининг энг юқори ҳажми Сирдарё (36,9 фоиз) ва Андижон вилоятларидаги (27,4
фоиз) акциядорлик жамиятлари ҳисобига тўғри келди.
Қимматли қоғозларнинг номинал нархига нисбатан юқори даражадаги фарқ
қуйидаги акциядорлик жамиятларининг акциялари билан тузилган савдо битимларида
кузатилди:
1. «Guliston Ekstrakt-Yog'» АЖ. Нисбат – 14,41:1. Ушбу акциядорлик
жамияти бир дона акциясининг савдо кунидаги биржа нархи 28 800 сўмдан иборат
бўлди. Акциянинг номинал қиймати эса 1999 сўмни ташкил қилади.
2. «Buxorogazsanoatqurilish» АЖ. Нисбат – 9:1. Ушбу
эмитент бир дона акциясининг савдо кунидаги биржа нархи 4 500 сўмдан иборат
бўлди. Акциянинг номинал қиймати 500 сўмни ташкил қилади.
Шунингдек, ўтган ҳафтада инвесторлар тоифасига кўра биржа савдоларида
жисмоний шахслар фаоллиги кузатилиб, тузилган умумий битимлар ҳажмининг – 94,3
фоизи айнан улар ҳиссасига тўғри келди. Таҳлилларга кўра инвестор сифатида
жисмоний шахслар энг кўп агросаноат тармоғидаги акциядорлик жамиятлари (39,1
фоиз) ва тижорат банкларининг (29,3 фоиз) акцияларига юқори қизиқиш билдиришган.
Таҳлилларга кўра, фонд биржасида йил бошидан буён 72,8 млрд. сўмлик 2 106
та савдо битими қайд қилинди. Ушбу даврда биржа савдоларида 88 та эмитентнинг 1,3
млрд. дона қимматли қоғозлари сотилган.