Фонд биржасида корпоратив қимматли қоғозлар билан савдолар қизғин тус олиб бормоқда
2019 йилнинг 4 - 8 феврал кунлари “Тошкент” Республика фонд биржаси савдоларида 32 та акциядорлик жамиятининг қимматли қоғозлари билан 1 160 та битим қайд қилинди. Хафта давомидаги савдолар натижасида 8,4 млн. дона корпоратив қимматли қоғозлар билан жами 947 млн. сўмлик битимлар имзоланди.
Корпоратив акциялар билан ўртача кунлик савдо айланмаси ҳисобот даврида 189,4 млн. сўмни, ўртача битим қиймати эса 0,81 млн. сўмни ташкил этди. Шу билан бирга, ушбу даврда савдодаги ҳар бир дона акциянинг ўртача нарх кўрсаткичи 112,0 сўмдан иборат бўлди. Ҳисобот даврининг ҳар бир кунига 1,7 млн. дона корпоратив акциялар олди-сотдиси тўғри келди.
Таҳлиллар жами савдо айланмасининг 50,1 фоизи (474,5 млн. сўм) иқтисодиётнинг қурилиш тармоғига мансуб жамиятлар, 26,1 фоизи (247,9 млн. сўм) саноат корхоналари ва 9,3 фоизи (88,0 млн. сўм) агросаноат комплексидаги акциядорлик жамиятларининг қимматли қоғозлари билан амалга оширилган битимлардан иборат бўлганини кўрсатди.
Ҳафта давомида савдо айланмаси ҳажми юқори бўлган эмитентларни “Qizilqumsement” АЖ (ҳафталик савдо айланмасининг – 39,5 фоизи ёки 374,7 млн. сўм), “Qo'qon mexanika zavodi” АЖ (14,0 фоиз ёки 132,7 млн. сўм), “Olmaliq KMK” АЖ (10,0 фоиз ёки 94,2 млн. сўм) ва “Biokimyo” АЖ (9,3 фоиз ёки 88,0 млн. сўм) ташкил этди. Умумий савдо айланмасининг 72,8 фоизи (689,6 млн. сўм) мазкур акциядорлик жамиятлари хиссасига тўғри келади.
Битимлар сони бўйича етакчиликни ўтган ҳафтада “Qizilqumsement” АЖ эгаллаган ҳолда, унинг 187,9 минг дона акцияси билан 365 та битим амалга оширилди. Ундан кейинги ўринларни эса “Qo'qon mexanika zavodi” АЖ (281 та битим) “Kvarts” АЖ (92 та битим) ва “IPOTEKA-BANK” АИТБ (91 та битим) эгаллади.
Ўтган ҳафтада инвесторлар тоифасига кўра биржа савдоларида жисмоний шахслар фаоллиги кузатилиб, тузилган умумий битимлар ҳажмининг – 68,8 фоизи (652,3 млн. сўм), битимлар сонининг эса – 89,0 фоизи (1033 та битим) айнан улар ҳиссасига тўғри келди.
Шунингдек, ўтган ҳафтада фонд биржасида республикамизнинг 6 та ҳудудида жойлашган акциядорлик жамиятларининг қимматли қоғозлари билан савдо битимлари имзоланди. Биржа битимларининг энг юқори ҳажми Навоий вилояти (39,5 фоиз), Фарғона вилояти (25,0 фоиз) ва Тошкент вилоятидаги (24,5 фоиз) акциядорлик жамиятлари ҳисобига тўғри келди.
Йил бошидан буён “Тошкент” Республика фонд биржасида 55 та акциядорлик жамиятининг 218,3 млн. дона корпоратив қимматли қоғозлари билан умумий қиймати 5,2 млрд. cўм бўлган 6022 та савдо битими қайд қилиган.