Фонд биржасида ҳафта давомида 1099 та битим имзоланди
2018 йилнинг 21 - 25 январь кунлари “Тошкент” Республика фонд биржаси савдоларида 33 та акциядорлик жамиятининг қимматли қоғозлари билан 1099 та битим қайд қилиниб, 18,5 млн. дона корпоратив акциялар 439,8 млн. сўмга сотилди.
Корпоратив акциялар билан ўртача кунлик савдо айланмаси ҳисобот даврида 88,0 млн. сўмни, ўртача битим қиймати эса 0,42 млн. сўмни ташкил этди. Шу билан бирга, ушбу даврда сотилган бир дона акциянинг ўртача нарх кўрсаткичи 23,77 сўмдан иборат бўлди. Ҳисобот даврининг ҳар бир кунига 3,7 млн. дона корпоратив акциялар олди-сотдиси тўғри келди.
Таҳлиллар жами савдо айланмасининг 36,1 фоизи (158,6 млн. сўм) қурилиш материаллари тармоғига мансуб жамиятлар, 35,6 фоизи (156,7 млн. сўм) ишлаб чиқариш корхоналари ва 10.9 фоизи (47,6 млн. сўм) тижорат банкларининг қимматли қоғозлари билан амалга оширилган битимлардан иборат бўлганини кўрсатди. Мамлакатимиз ҳукуматининг “Qo'qon mexanika zavodi” АЖ акциялярини оммавий халққа таклиф этиш борасидаги қарори билан савдога чиқарилган корпоратив акциялар билан савдолар қизғин тус олиб бормоқда ва ўтган хафта давомида жамиятнинг корпоратив акциялари билан 113,5 млн. сўмлик савдо битими тузилди.
Битимлар сони бўйича ҳам етакчиликни ўтган ҳафтада “Qo'qon mexanika zavodi” АЖ эгаллаган ҳолда, унинг 78,8 минг дона акцияси билан 303 та битим амалга оширилди. Ундан кейинги ўринларни эса “Qizilqumsement” АЖ (233 та битим) ва “O'zsanoatqurilishbank” АТБ (146 та битим) эгаллади.
Ўтган ҳафтада инвесторлар тоифасига кўра биржа савдоларида жисмоний шахслар фаоллиги кузатилиб, тузилган умумий битимлар ҳажмининг – 82,5 фоизи (0,36 млрд. сўм), битимлар сонининг эса – 85,6 фоизи (941 та битим) айнан улар ҳиссасига тўғри келди.
Шунингдек, ўтган ҳафтада фонд биржасида республикамизнинг 8 та ҳудудида жойлашган листинг компаниялари қимматли қоғозлари билан савдо битимлари имзоланди. Биржа битимларининг энг юқори ҳажми Фарғона вилояти (36,1 фоиз) ва Навоий вилоятидаги (26,1 фоиз) акциядорлик жамиятлари ҳисобига тўғри келди.
Фонд биржасида йил бошидан буён 3,6 млрд. сўмлик 3 655 та савдо битими қайд қилинди. Ушбу даврда биржа савдоларида 47 та акциядорлик жамиятининг 199,7 млн. дона корпоратив қимматли қоғозлари сотилган.