2018 йилнинг 9 – 13 апрель кунлари «Тошкент» Республика фонд биржаси савдоларида 18 та акциядорлик жамиятининг қимматли қоғозлари билан 559 та битим қайд қилиниб, 3,0 млрд. дона акция 5,8 млрд. сўмга сотилди.

Таҳлиллар жами савдо айланмасининг 61,6 фоизи суғурта компаниялари ва 36,8 фоизи тижорат банкларининг қимматли қоғозлари билан амалга оширилган битимлардан иборат бўлганини кўрсатди.

Энг йирик битим 13 апрель санасида Ягона дастурий техник мажмуаси савдо тизимининг асосий секциясида «Kapital sug'urta» АЖнинг 1,88 млрд. дона акцияси билан 1,88 млрд. сўм миқдорида тузилди. Бир дона акциянинг сотув нархи 1,0 сўмни ташкил қилди.

Битимлар сони бўйича етакчиликни ўтган ҳафтада «Hamkorbank» АТБ эгаллаган ҳолда,  унинг 5,9 млн. дона акцияси билан 0,9 млрд. сўмлик 424 та битим амалга оширилди. Бу ҳафталик савдо айланмасининг 75,8 фоизини ташкил этади.

Қимматли қоғозлар билан ўртача кунлик савдо айланмаси ҳисобот даврида 1,1 млрд. сўмни, ўртача битим қиймати эса 10,3 млн. сўмни ташкил этди.

Қимматли қоғозларнинг номинал нархига нисбатан юқори даражадаги фарқ «O'zkimyopolimersavdo» АЖ акциялари билан тузилган савдо битимларида кузатилди. Бунда номинал қиймати 2 380 сўм бўлган жамият акцияларининг савдо кунидаги биржа нархи 38 400 сўмни ташкил этди.

Ҳафта давомида савдо айланмаси ҳажми юқори бўлган эмитентларни «Kapital sug'urta» АЖ (ҳафталик савдо айланмасининг – 51,8 фоизи ёки 3,0 млрд. сўм), «Kapitalbank» АТБ (19,0 фоиз ёки 1,0 млрд. сўм), «Hamkorbank» АТБ (15,9 фоиз ёки 0,9 млрд. сўм) ва «Alskom» АЖ СК (9,7 фоиз ёки 0,6 млрд. сўм) ташкил этди. Савдо айланмасининг 96,5 фоизи (5,5 млрд. сўм) улар ҳиссасини  ташкил этди.

Ўтган ҳафтада ҳам инвесторлар тоифасига кўра биржа савдоларида жисмоний шахслар фаоллиги кузатилиб, тузилган умумий битимлар ҳажмининг – 42,6 фоизи (2,5 млрд. сўм), битимлар сонининг эса – 98,4 фоизи (550 дона) айнан улар ҳиссасига тўғри келди. Суғурта компанияларининг инвесторлар тоифасига кўра умумий битимлар ҳажмидаги улуши эса 37,5 фоизни ташкил қилди.

Шунингдек, ўтган ҳафтада фонд биржасида республикамизнинг 5 та ҳудудида жойлашган листинг компаниялари қимматли қоғозлари билан савдо битимлари имзоланди. Биржа битимларининг энг юқори ҳажми Тошкент шаҳри (84,0 фоиз) ва Андижон вилоятидаги (15,8 фоиз) акциядорлик жамиятлари ҳисобига тўғри келди.

Фонд биржасида йил бошидан буён 76,6 млрд. сўмлик 4 612 та савдо битими қайд қилинди. Ушбу даврда биржа савдоларида 63 та акциядорлик жамиятининг 3,3 млрд. дона қимматли қоғозлари сотилган.