2018 йилнинг 26 - 30 март кунлари «Тошкент» Республика фонд биржаси савдоларида 15 та акциядорлик жамиятининг қимматли қоғозлари билан 72 та битим қайд қилиниб, 7,3 млн. дона акция 8,0 млрд. сўмга сотилди.

Таҳлиллар жами савдо айланмасининг 86,5 фоизи тижорат банклари ва 13,4 фоизи қурилиш материаллари тармоғидаги компанияларнинг қимматли қоғозлари билан амалга оширилган битимлардан иборат бўлганини кўрсатди.

Энг йирик битим 29 март санасида асосий секцияда «Kapitalbank» АТБнинг 3,2 млн. дона акцияси билан 3,0 млрд. сўм миқдорида тузилди. Бир дона акциянинг сотув нархи 950 сўмни ташкил қилди.

Битимлар сони бўйича етакчиликни ўтган ҳафтада «O'zkimyopolimersavdo» АЖ эгаллаган ҳолда,  унинг 3,5 минг дона акцияси билан 10,3 млн. сўмлик 18 та битим амалга оширилди.

Қимматли қоғозлар билан ўртача кунлик савдо айланмаси ҳисобот даврида 1,6 млрд. сўмни, ўртача битим қиймати эса 112,2 млн. сўмни ташкил этди. Шу билан бирга, ушбу даврда сотилган бир дона акциянинг ўртача нарх кўрсаткичи 1 109 сўмдан иборат бўлди. 

Ҳафта давомида савдо айланмаси ҳажми юқори бўлган эмитентларни «Kapitalbank» АТБ (ҳафталик савдо айланмасининг – 55,7 фоизи), «Ravnaq-bank» ХАТБ (24,4 фоиз), «Ohangaronsement» АЖ (12,5 фоиз) ва «Universal bank» ХАТБ (6,2 фоиз) ташкил этди. Савдо айланмасининг 98,8 фоизи улар ҳиссасини  ташкил этди.

Ўтган ҳафтада инвесторлар тоифасига кўра биржа савдоларида жисмоний шахслар фаоллиги кузатилиб, тузилган умумий битимлар ҳажмининг – 86,7 фоизи, битимлар сонининг эса – 83,3 фоизи айнан улар ҳиссасига тўғри келди.

Шунингдек, ўтган ҳафтада фонд биржасида республикамизнинг 6 та ҳудудида жойлашган листинг компаниялари қимматли қоғозлари билан савдо битимлари имзоланди. Биржа битимларининг энг юқори ҳажми Тошкент шаҳри (80,3 фоиз) ва Тошкент вилоятидаги (12,6 фоиз) акциядорлик жамиятлари ҳисобига тўғри келди.

2018 йилнинг I чораги давомида «Тошкент» Республика фонд биржаси савдо айланмасининг умумий ҳажми 43,6 млрд. сўмдан иборат бўлди ва 2017 йилнинг шу даврига (19,9 млрд. сўм) нисбатан 2,2 мартага ошди.

Шунингдек, ушбу даврда қимматли қоғозлар билан амалга оширилган битимлар сони ҳам юқори кўрсаткични – 686 тани ташкил этиб, 2017 йилнинг мазкур даврига нисбатан 40% (491 та битим) юқори натижа қайд қилинди. Биринчи чоракда биржа савдолари орқали 58 та акциядорлик жамиятининг 161,6 млн. дона қимматли қоғозлари билан биржа битимлари тузилди.