Toshkentda UzNIF IPOsi va kapital bozori istiqbollariga bag‘ishlangan tadbir o‘tkazildi
Joriy yilning 20-may kuni Toshkent shahrida O‘zbekiston Respublikasi Milliy investitsiya jamg‘armasi (UzNIF)ning IPOsiga bag‘ishlangan tadbir bo‘lib o‘tdi. Unda davlat tashkilotlari, xalqaro moliyaviy institutlar, investitsiya kompaniyalari hamda fond bozori mutaxassislari qatnashdi.
Tadbir doirasida UzNIF aksiyalarining London fond birjasidagi ilk savdolariga bag‘ishlangan videolavhalar namoyish etildi. Shuningdek, London hamda Toshkent fond birjalaridagi savdo sessiyalari yakunlariga oid taqdimot materiallari namoyish etildi.
“Toshkent” RFB boshqaruv raisi vazifasini bajaruvchi Fayzulla Tashov o‘z nutqida UzNIF IPOsi nafaqat yangi investitsiya loyihasi, balki O‘zbekiston kapital bozori yangi rivojlanish bosqichiga o‘tayotganining amaliy tasdig‘i ekanini ta’kidladi.
.png)
Bugun biz zamonaviy, ochiq va raqobatbardosh kapital bozori uchun mustahkam poydevor yaratmoqdamiz. Bu natija to‘xtab qolish uchun emas, aksincha, xalqaro kapital bozorlari bilan integratsiyani yanada jadallashtirish uchun muhim asosdir. Shu maqsadda ikkilamchi listing mexanizmlarini rivojlantirish, xalqaro moliyaviy institutlar ishtirokini kengaytirish hamda axborot oshkoraligi va korporativ boshqaruv standartlarini yangi bosqichga olib chiqish ustuvor vazifalardan hisoblanadi, — dedi F.Tashov.
Bundan tashqari,"Toshkent" RFB tomonidan xorijiy valyutada nominallashtirilgan korporativ obligatsiyalarni joriy etish uchun savdo, depozitar va kliring infratuzilmalarida o‘tkazilgan kompleks test sinovlari muvaffaqiyatli yakunlangani ma’lum qilindi. Bu esa bozor yangi moliyaviy instrumentlar bosqichiga o‘tayotganini anglatadi.
UzNIF IPOsi O‘zbekiston kapital bozorining xalqaro investitsiya tizimiga integratsiyalashuvi, bozor infratuzilmasini modernizatsiya qilish va global investorlar ishonchini mustahkamlash yo‘lidagi muhim bosqich sifatida baholanmoqda.