O‘zbekiston kapital bozori tarixida yangi sahifa ochildi
18.05.2026
.png)
O‘zbekiston Respublikasi Milliy investitsiya jamg‘armasi (UzNIF) qimmatli qog‘ozlarining Toshkent va London fond birjalaridagi ikkilamchi savdolari rasman boshlandi. Mazkur voqea mamlakatimiz milliy kapital bozori tarixida muhim bosqich sifatida muhrlandi.
Eslatib o‘tamiz, ushbu jarayon O‘zbekiston Respublikasi Prezidentining 2024-yil 27-avgustdagi PQ–303-sonli “O‘zbekiston Respublikasi milliy investitsiya jamg‘armasini tashkil etish to‘g‘risida”gi qarori asosida amalga oshirilib, mamlakatimiz kapital bozorini yangi bosqichga olib chiquvchi strategik qadam sifatida e’tirof etilmoqda.
UzNIF IPOsi nafaqat O‘zbekiston kapital bozori tarixidagi eng yirik ommaviy joylashtirishlardan biri bo‘ldi, balki 2026-yilda London fond birjasida amalga oshirilgan eng yirik IPO hamda Yevropa mintaqasida hajmi bo‘yicha ikkinchi yirik IPO sifatida ham qayd etildi.
Ikkilamchi savdolar Toshkent vaqti bilan Toshkent fond birjasida soat 09:30 da, London fond birjasida esa soat 12:00 da boshlandi.
Dastlab Toshkent fond birjasida UzNIF aksiyalari bilan savdolar ochilish narxi 5,39 so‘mni tashkil etdi. London fond birjasida esa 1 GDR qiymati 27,50 AQSH dollarida shakllandi va 1 GDR tarkibiga 64 700 dona aksiya kirishi hisobga olinganda, bir aksiyaning ekvivalent qiymati milliy valyutada taxminan 5,094 so‘mni tashkil etdi. Natijada, Toshkent fond birjasidagi savdolar ochilish narxi mazkur ko‘rsatkichdan yuqoriroq darajada shakllandi.
Joriy yilning 18-may kungi savdolar yakunlariga ko‘ra:
- Maksimal narx — 7,5 so‘m;
- Minimal narx — 5,07 so‘m;
- Ijro etilgan bitimlar soni — 4,2 mingdan ortiq;
- Savdoda qatnashgan aksiyalar soni — 726 million dona;
- Umumiy savdolar hajmi — qariyb 4,34 milliard so‘m.
Savdo yakunlariga ko‘ra, aksiyaning yopilish narxi bir dona aksiya uchun 5,46 so‘mni tashkil etdi. Natijada, mazkur ko‘rsatkich jismoniy shaxslar uchun belgilangan joylashtirish narxiga nisbatan taxminan 24 foizga, yuridik shaxslar va yirik investorlar uchun belgilangan joylashtirish narxiga nisbatan esa taxminan 17 foizga yuqori narxda shakllandi.
Qayd etish joizki, bitimlarning aksariyati jismoniy shaxslar tomonidan masofadan turib shu jumladan, Jett platformasi va boshqa platformalar orqali o‘tkazilgan.
Mazkur natijalar O‘zbekiston kapital bozoriga bo‘lgan yuqori ishonch va qiziqishning amaliy ifodasi bo‘lib, mamlakat iqtisodiyotidagi barqaror o‘sish, investitsion muhitning yaxshilanishi hamda sohada amalga oshirilayotgan keng qamrovli islohotlarning mantiqiy davomi hisoblanadi.
Ayniqsa, ushbu jarayonlar O‘zbekiston Respublikasi Prezidentining kapital bozorini rivojlantirishga qaratilgan siyosati, shuningdek O‘zbekiston Respublikasi Istiqbolli loyihalar milliy agentligi hamda Iqtisodiyot va moliya vazirligi tomonidan olib borilayotgan tizimli va muvofiqlashtirilgan sa’y-harakatlar samarasi sifatida baholanmoqda.