Valyuta obligatsiyalari muomalasi va investorlar uchun qo‘shimcha talablar
01.05.2026

“Tartibga solish qumdoni” maxsus huquqiy rejimi doirasida xorijiy valyutada obligatsiyalarni chiqarish, joylashtirish, muomalaga chiqarish va so‘ndirish tartibi to‘g‘risidagi" nizomda valyuta obligatsiyalari bilan bog‘liq operatsiyalar, ishtirokchilarning majburiyatlari va moliyaviy barqarorlikni ta’minlashga qaratilgan qo‘shimcha talablar ham aniq belgilab berilgan:

 Muomala va bitimlar tartibi

Valyuta obligatsiyalarini joylashtirish va ularning oldi-sotdisi fond birjasining savdo maydonchasida belgilangan qoidalar asosida amalga oshiriladi. Birjadan tashqari bitimlar esa yozma shaklda tuzilib, amaldagi qonunchilikka muvofiq ro‘yxatdan o‘tkaziladi.

 Market-meyker instituti joriy etilmoqda

Emitent va investitsiya vositachisi o‘rtasidagi shartnomada vositachining vakolatli organ tomonidan belgilangan parametrlar doirasida market-meyker funksiyalarini bajarish majburiyati nazarda tutiladi.

 Emitentlar uchun moliyaviy kovenantlar

Emissiya risolasida emitent quyidagi moliyaviy ko‘rsatkichlarga rioya etishi shart:

— qarz yuki koeffitsiyenti 6 dan oshmasligi;

— qarzga xizmat ko‘rsatish koeffitsiyenti 1,1 dan kam bo‘lmasligi;

— joriy likvidlik koeffitsiyenti 1,2 dan kam bo‘lmasligi;

— obligatsiyalar bo‘yicha to‘lovlarda texnik defolt holatiga yo‘l qo‘yilmasligi.

Mazkur ko‘rsatkichlar belgilangan chegaralardan chiqsa, kovenant buzilgan deb hisoblanadi.

Hisob-kitob va hisobot standartlari

Kovenantlar milliy buxgalteriya standartlari asosida shakllantirilgan moliyaviy hisobotlarga tayanadi. Agar hisobotlar xalqaro standartlar asosida tuzilgan bo‘lsa, taqqoslanadigan ko‘rsatkichlar qo‘llaniladi.

 Jismoniy shaxslar uchun tartib

Fuqarolar valyuta obligatsiyalarini sotib olishda mablag‘larni faqat bank tizimi orqali kiritishlari mumkin. Naqd holda agent-bank hisobvarag‘iga yoki shaxsiy hisobvarag‘idan o‘tkazish orqali. 

Bunda investitsiya vositachilari tomonidan naqd pullarni bevosita qabul qilish (kassalar yoki notariuslar orqali) taqiqlanadi.