Respublika fond birjasi "Toshkent" 2025-yilning birinchi yarim yilligi yakunlarini ma’lum qildi

Buxgalteriya hisobining milliy standartlariga (BHMS) ko‘ra, hisobot davrida birjaning tushumi 18,6 milliard so‘mni ($1,4 mln) tashkil etdi, bu 2024-yilning shu davridagi ko‘rsatkichdan (4,4 mlrd so‘m) 320 foizga yuqori. Bu miqdor 2024-yildagi yillik tushumning 55 foiziga teng (33,9 mlrd so‘m). Ayniqsa, qimmatli qog‘ozlar bilan tuzilgan bitimlardan olingan daromad 6 barobardan ziyod o‘sdi, bu esa bozor faolligi va birja savdo platformasidagi bitimlar sonining ortganini aks ettiradi.

Sof foyda 11,2 milliard so‘mni ($0,9 mln) tashkil etdi — bu o‘tgan yilning shu davridagi ko‘rsatkichdan (33,8 mln so‘m) 330 marta ko‘pdir. Shu tariqa, 2025-yilning dastlabki olti oyida birja 2024-yil davomida olingan foydaning 91 foizini allaqachon amalga oshirdi. Xususiy kapital rentabelligi (ROE) yillik hisobda 24,5 foizni tashkil etdi.

Qimmatli qog‘ozlar savdosining umumiy hajmi 12,02 trillion so‘mni ($933,3 mln) tashkil etib, 2024-yilning birinchi yarim yilligiga nisbatan 17 barobarga oshdi. Tuzilgan bitimlar soni 214 851 taga yetdi, shundan 85 foizi birja kotirovkalash ro‘yxatiga kiritilgan qimmatli qog‘ozlar bilan amalga oshirilgan. O‘rtacha kunlik savdo hajmi esa 97,7 milliard so‘mni ($7,59 mln) tashkil etdi.

Respublika fond birjasi "Toshkent" boshqaruvi raisi Georgiy Paresishvili quyidagilarni ta’kidladi:

"Bunday ijobiy o‘zgarishlarni kuzatayotganimizdan juda xursandmiz. Savdo hajmlari va moliyaviy ko‘rsatkichlarning keskin o‘sishi — bu yangilangan Birja jamoasining samarali va uzviy faoliyati natijasidir. Ushbu natijalarga biz nafaqat barcha yo‘nalishlar bo‘yicha operatsion daromadlarning o‘sishi, balki moliyaviy daromadlarning sezilarli oshishi hamda xarajatlarning qat’iy nazorati orqali erishdik.

Kompaniyaning aksiyadorlik qiymatini oshirish — biz uchun O‘zbekiston fond bozorini rivojlantirish bilan bir qatorda asosiy ustuvor yo‘nalishdir. Biz Birjaning mamlakat iqtisodiyotiga mahalliy va xalqaro investitsiyalarni jalb etuvchi markaz sifatidagi mavqeini mustahkamlashga qat’iy bel bog‘laganmiz."