2017 йилнинг 20 - 24 ноябр кунлари «Тошкент» Республика фонд биржаси савдоларида 14 та акциядорлик жамиятининг қимматли қоғозлари билан 56 та битим қайд қилиниб, 73,1 млн. дона акция 35,6 млрд. сўмга сотилди. Ушбу кўрсаткич ўтган ҳафта савдо якунларига нисбатан 13,4 маротабага кўпдир.

Таҳлиллар жами савдо айланмасининг 98,7 фоизи тижорат банклари ва 1,3 фоизи саноат тармоғидаги акциядорлик жамиятларининг қимматли қоғозлари билан амалга оширилган битимлардан иборат бўлганини кўрсатди. Энг йирик битим 23 ноябрь санасида «Trastbank» ХАБнинг 13,9 млн. дона акцияси билан 18,5 млрд. сўм миқдорида тузилди.

Шунингдек, тузилган битимлар сони бўйича етакчиликни ҳам «Trastbank» ХАБ эгаллаган ҳолда, ҳафта давомида ушбу банкнинг 25,2 млн. дона акциялари билан 33,3 млрд. сўмлик 23 та битим амалга оширилди.

Ҳафта давомида савдо айланмаси ҳажми юқори бўлган эмитентларни  «Trastbank» ХАБ (ҳафталик савдо айланмасининг – 96,2 фоизи) ва «Turkiston»  ХАТБ (2,3 фоизи) ташкил этди. Бу ҳафталик савдо айланмасининг 98,5 фоизини ташкил этади.

Ўтган ҳафта фонд биржасида республикамизнинг 5 та ҳудудида жойлашган листинг компаниялари қимматли қоғозлари билан савдо битимлари имзоланди. Биржа битимларининг энг юқори ҳажми Тошкент шаҳри (96,8 фоиз) ва Наманган вилоятидаги (1,3 фоиз) акциядорлик жамиятлари ҳисобига тўғри келди.

Қимматли қоғозларнинг номинал нархига нисбатан юқори даражадаги фарқ қуйидаги акциядорлик жамиятларининг акциялари билан тузилган савдо битимларида кузатилди:

1. «O`ZBEKGEOFIZIKA» АЖ. Нисбат – 4:1. Ушбу акциядорлик жамияти бир дона акциясининг савдо кунидаги биржа нархи 1144 сўмдан иборат бўлди. Акциянинг номинал қиймати эса 286 сўмни ташкил қилади.

2. «Qo'qonspirt» АЖ. Нисбат – 2:1. Ушбу эмитент бир дона акциясининг савдо кунидаги биржа нархи 2 сўмдан иборат бўлди. Акциянинг номинал қиймати 1 сўмни ташкил қилади.

Шунингдек, ўтган ҳафтада инвесторлар тоифасига кўра биржа савдоларида жисмоний шахслар фаоллиги кузатилиб, тузилган умумий битимлар ҳажмининг – 79.1 фоизи, битимлар сонининг эса – 96.3 фоизи айнан улар ҳиссасига тўғри келди. Таҳлилларга кўра инвестор сифатида жисмоний шахслар энг кўп тижорат банкларининг (98,3 фоиз) акцияларига юқори қизиқиш билдиришган.

Таҳлилларга кўра, фонд биржасида йил бошидан буён 112,2 млрд. сўмлик 2255 та савдо битими қайд қилинди. Ушбу даврда биржа савдоларида 90 та эмитентнинг 1,4 млрд. дона қимматли қоғозлари сотилган.