2017 йилнинг 11 - 15 сентябр кунлари «Тошкент» Республика фонд биржаси савдоларида 18 та акциядорлик жамиятининг қимматли қоғозлари билан 66 та битим қайд қилиниб, 720,5 минг. дона акция 1,0 млрд. сўмга сотилди.

Таҳлиллар жами савдо айланмасининг 76,1 фоизи тижорат банкларининг ва 21,4 фоизи агросаноат мажмуасига мансуб акциядорлик жамиятлари қимматли қоғозлари билан амалга оширилган битимлардан иборат бўлганини кўрсатди. Энг йирик битим 12 сентябр санасида «Turkiston» ХАТБнинг 239,5 минг дона акцияси билан 239,5 млн. сўм миқдорида тузилди.

Шунингдек, тузилган битимлар сони бўйича етакчиликни «Marg'ilon Fayz savdo kompleksi» АЖ эгаллаган ҳолда,  ҳафта давомида ушбу жамиятнинг 16,7 минг дона акциялари билан 16,9 млн. сўмлик 18 та битим амалга оширилди.

Ҳафта давомида савдо айланмаси ҳажми юқори бўлган эмитентларни «Turkiston» ХАТБ (ҳафталик савдо айланмасининг – 37,6 фоизи), «Universal bank» ХАТБ (21,5 фоизи), «Guliston Ekstrakt-Yog'» АЖ (20,9 фоизи) ҳамда «Turonbank» АТБ (14,8 фоизи) ташкил этди. Бу ҳафталик савдо айланмасининг 95 фоизини ташкил этади.

Ўтган ҳафта фонд биржасида республикамизнинг 7 та ҳудудида жойлашган листинг компаниялари қимматли қоғозлари билан савдо битимлари имзоланди. Биржа битимларининг энг юқори ҳажми Тошкент шаҳри (55,2 фоиз) ва Фарғона  (23,1 фоиз) вилоятидаги акциядорлик жамиятлари ҳисобига тўғри келди.

Қимматли қоғозларнинг номинал нархига нисбатан юқори даражадаги фарқ қуйидаги акциядорлик жамиятларининг акциялари билан тузилган савдо битимларида кузатилди:

1. «Shifobaxsh buloq» АЖ. Нисбат – 53,54:1. Ушбу акциядорлик жамияти бир дона акциясининг савдо кунидаги биржа нархи 40 000 сўмдан иборат бўлди. Акциянинг номинал қиймати эса 747 сўмни ташкил қилади.

2.  «Guliston Ekstrakt-Yog'» АЖ. Нисбат – 14,40:1. Ушбу эмитент бир дона акциясининг савдо кунидаги биржа нархи 28 800 сўмдан иборат бўлди. Акциянинг номинал қиймати 1 999 сўмни ташкил қилади.

Шунингдек, ўтган ҳафтада инвесторлар тоифасига кўра биржа савдоларида жисмоний шахслар фаоллиги кузатилиб, тузилган умумий битимлар ҳажмининг – 61,7 фоизи айнан улар ҳиссасига тўғри келди. Таҳлилларга кўра инвестор сифатида жисмоний шахслар энг кўп тижорат банклари акцияларига юқори қизиқиш билдиришган (61,2 фоиз).

Таҳлилларга кўра, фонд биржасида йил бошидан буён 66,6 млрд. сўмлик 1862 та савдо битими қайд қилинди. Ушбу даврда биржа савдоларида 82 та эмитентнинг 1,2 млрд. дона қимматли қоғозлари сотилган.