2017 йилнинг 21 - 25 август кунлари «Тошкент» Республика фонд биржаси савдоларида 15 та акциядорлик жамиятининг қимматли қоғозлари билан 92 та битим қайд қилиниб, 3,3 млн. дона акция 5,9 млрд. сўмга сотилди.

Таҳлиллар жами савдо айланмасининг 93,3 фоизи тижорат банкларининг қимматли қоғозлари билан амалга оширилган битимлардан иборат бўлганини кўрсатди. Энг йирик битим 24 август санасида « O'zsanoatqurilishbank» АТБнинг 20,0 минг дона облигацияси билан 2,0 млрд. сўм миқдорида тузилди.

Тузилган битимлар сони бўйича етакчиликни «Guliston Ekstrakt-Yog'» АЖ эгаллаган ҳолда,  ҳафта давомида ушбу жамиятнинг 8,1 минг дона акциялари билан 250,9 млн. сўмлик 28 та битим амалга оширилди.

Ҳафта давомида савдо айланмаси ҳажми юқори бўлган эмитентларни «Turkiston» ХАТБ (ҳафталик савдо айланмасининг – 53,6 фоизи), «O'zsanoatqurilishbank» АТБ (33,9 фоиз) хамда ХАТБ «Universal bank» (5,8 фоиз) ташкил этди. Бу ҳафталик савдо айланмасининг 93,3 фоизини ташкил этади.

Ўтган ҳафта фонд биржасида республикамизнинг 7 та ҳудудида жойлашган листинг компаниялари қимматли қоғозлари билан савдо битимлари имзоланди. Биржа битимларининг энг юқори ҳажми Тошкент шаҳри (89,6 фоиз), Фарғона (6,1 фоиз) ва Сирдарё (4,3 фоиз) вилоятларидаги акциядорлик жамиятлари ҳисобига тўғри келди.

Шунингдек, ўтган ҳафтада инвесторлар тоифасига кўра биржа савдоларида юридик шахслар фаоллиги кузатилиб, тузилган умумий битимлар ҳажмининг – 61,9 фоизи айнан улар ҳиссасига тўғри келди. Ушбу ҳафтада тузилган битимлар сони бўйича эса жисмоний шахслар пешқадамлиги кузатилди (93,5%).

Фонд биржасида йил бошидан буён 62,9 млрд. сўмлик 1712 та савдо битими қайд қилинди. Ушбу даврда биржа савдоларида 77 та эмитентнинг 1,2 млрд. дона қимматли қоғозлари сотилган.