2017 йилнинг 13-17 февраль кунлари «Тошкент» Республика фонд биржаси савдоларида 11 та акциядорлик жамиятининг қимматли қоғозлари билан 32 та битим қайд қилиниб, 428,3 минг дона акция 389,6 млн. сўмга сотилди.  

Таҳлиллар жами савдо айланмасининг 77,3 фоизи тижорат банкларининг қимматли қоғозлари билан амалга оширилган битимлардан иборат бўлганини кўрсатди.

Энг йирик битим 14 февраль санасида «Kapitalbank» АТБнинг номинал қиймати 950 сўм бўлган 260 минг дона акцияси билан 247,0 млн. сўм миқдорида тузилди.

Бундан ташқари, ўтган ҳафтада «Marg'ilon fayz savdo kompleksi» АЖ тузилган савдо битимлари сони бўйича етакчилик қилиб, ҳафта давомида ушбу жамиятнинг 57,4 минг дона акциялари билан 58,0 млн. сўмлик 10 та савдо битими имзоланди.

Ҳафта давомида савдо айланмаси ҳажми юқори бўлган эмитентларни «Kapitalbank»  АТБ (ҳафталик савдо айланмасининг – 63,4 фоизи), «Marg'ilon Fayz savdo kompleksi» АЖ (14,9%), «Universal bank» ХАТБ (12,8 фоиз), «Chilonzor buyum savdo kompleksi» АЖ (6,1%) ва «Toshkentvino kombinati» АЖ (1,1 фоиз) ташкил этди. Бу ҳафталик савдо айланмасининг 98,3 фоизини ташкил этади.

Ўтган ҳафта фонд биржасида республикамизнинг 4 та ҳудудида жойлашган листинг компаниялари қимматли қоғозлари билан савдо битимлари имзоланди. Биржа битимларининг энг юқори ҳажми Тошкент шаҳри (71,8 фоиз) ва Фарғона вилоятидаги (27,8 фоиз) акциядорлик жамиятлари ҳисобига тўғри келди.

Муҳим кўрсаткичлардан бири ҳисобланган қимматли қоғозларнинг ликвидлилик коэффициенти ўтган ҳафтада умумий ҳолатда 1,79 пунктни ташкил этди. Энг юқори ликвидлилик коэффициенти саноат тармоғига кирувчи акциядорлик жамиятларининг қимматли қоғозларига (4,14 пункт) тўғри келди. Таъкидлаш жоизки, ҳафта давомида тузилган савдо битимларининг 56,0 фоизи қимматли қоғозлар номинал қийматидан юқорироқ нархларда тузилган.

Шунингдек, ўтган ҳафтада инвесторлар тоифасига кўра биржа савдоларида юридик шахслар фаоллиги кузатилиб, тузилган умумий битимлар ҳажмининг – 83,4 фоизи айнан улар ҳиссасига тўғри келди. Ушбу ойда тузилган битимлар сони бўйича эса жисмоний шахслар пешқадамлиги кузатилди (84,4%).

Фонд биржасида йил бошидан буён 11,5 млрд. сўмлик 288 та савдо битими қайд қилинди. Ушбу даврда биржа савдоларида 42 та эмитентнинг 8,3 млн. дона қимматли қоғозлари сотилган.