Мустақиллик йилларида жамиятимиз ҳаётининг барча жабҳаларида бўлгани каби мамлакатимиз фонд бозорини ривожлантириш юзасидан ҳам бир қатор ишлар амалга оширилиб, бугунги кунда мустаҳкам иқтисодий-ҳуқуқий асосга эга бўлган ҳамда  халқаро андозаларга мувофиқ фаолият юритувчи фонд биржаси шаклланди ва республикамиз иқтисодиётининг асосий бўғинларидан бирига айланди.

“Тошкент” Республика фонд биржаси томонидан фонд бозори ҳақида аҳоли, айниқса ёшлар ўртасида тарғибот-ташвиқот ишларини кучайтириш, уларни биржа операцияларига жалб қилишга доир тадбирлар режаси ишлаб чиқилган бўлиб, унга кўра республикамиз ҳудудларидаги молия-иқтисод йўналиши олий ўқув юртлари ва коллежлар талабаларини фонд бозори фаолияти билан яқиндан таништириш, қимматли қоғозларга доир амалий билимларини янада мустаҳкамлаш мақсадида фонд биржаси мутахассислари томонидан ҳудудларда ва биржа савдо залида учрашувлар, семинарлар, тақдимот ва танловлар ўтказилмоқда.

Ушбу муносабат билан жорий йилнинг 23 декабр куни “Тошкент” Республика фонд биржаси  ва Ўзбекистон миллий университети ҳамкорлигида молия-иқтисод йўналиши талабалари иштирокида “Тошкент” Республика фонд биржасининг қимматли қоғозлар бозорида тутган ўрни” мавзусида семинар бўлиб ўтди. Мазкур семинарда талабаларга фонд биржаси тарихи,  мақсади, вазифалари, биржа савдо айланмаларини йиллар давомида ўсиш динамикаси, умумий савдо айланмасида иқтисодиёт тармоқларидаги улуши, Биржа котировкалаш варағи, «Тошкент» РФБнинг халқаро ҳамкорлик алоқалари ҳақида талабаларга  батафсил маълумотлар бериб ўтилди.

Бугунги кунда фонд биржаси мутахассислари томонидан Тошкент шаҳри ва республикамиз вилоятларининг молия-иқтисод йўналиши олий ўқув юртлари ҳамда коллеж талабалари иштирокида амалий семинарлар ўтказиш давом этмоқда.