Маълумки, “Тошкент” республика фонд  биржаси томонидан  қимматли қоғозлар бозори ҳақида аҳоли, айниқса, ёшлар ўртасида тарғибот-ташвиқот ишларини кучайтириш, олий ва ўрта-махсус ўқув юртлари талабалари иштирокида ушбу мавзуга бағишлаб учрашув ва семинарлар ташкил қилишга катта аҳамият қаратиб келинмоқда.

Айниқса, республикамизнинг барча ҳудудларида жойлашган молия-иқтисод йўналишидаги олий ва ўрта-махсус ўқув юртлари талабалари учун фонд бозори тўғрисида асосий тушунчалар, қимматли қоғозлар билан ўтказиладиган биржа савдолари тартиби ва унинг афзалликлари, бу бозорда тадбиркорлик фаолиятини юритишнинг ўзига хос жиҳатлари ҳақида маълумотлар бериб келинмоқда.

Яқинда худди шу мавзуга бағишланган тадбирлардан бири Самарқанд вилоятида бўлиб ўтди. Унда вилоятнинг  молия-иқтисод йўналишидаги олий ўқув юртлари талабалари  иштирок этишди. Тадбир “Тошкент” республика фонд биржаси, Қимматли қоғозлар бозорини мувофиқлаштириш ва ривожлантириш марказининг Самарқанд вилояти ҳудудий бошқармаси, Самарқанд вақт брокерлик уйи, Самарқанд давлат университети, Самарқанд давлат чет тиллар институти ва Самарқанд қишлоқ хўжалик институти хамкорлигида ташкил этилди.

Сўзга чиққанлар  фонд биржасининг қимматли қоғозлар бозорида тутган ўрни, мазкур биржанинг тарихи,  фаолият мақсади, вазифалари, биржа савдо айланмаларининг ўтган йиллар давомида ўсиш динамикаси, умумий савдо айланмасида иқтисодиёт тармоқларининг улуши, тузилган биржа битимлари сони, биржа котировкалаш варағи (биржа листинги), биржанинг халқаро ҳамкорлик алоқалари хақида  батафсил маълумот бериб ўтишди. Ёшларни қизиқтирган кўплаб саволларга атрофлича жавоб беришди.

Бундай семинарлар  аниқ чора-тадбирлар режаси асосида республикамизнинг барча ҳудудларида  бўлиб ўтмоқда.