2016 йилнинг октябр ойида фонд биржасида 21 та савдо сессияси ўтказилиб, 36 та акциядорлик жамиятининг 352,6 млн. дона қимматли қоғозлари билан 200 та савдо битими тузилди.

Cавдо айланмаси октябр ойида 27,7 млрд. сўмни ташкил қилиб, 2015 йилининг мазкур даврига нисбатан деярли 17 маротаба юқори кўрсаткич қайд этилди (1,6 млрд. сўм).

Ўтган ой мобайнида Ягона дастурий-техник комплекснинг қуйидаги савдо секцияларида савдо битимлари амалга оширилди:

асосий секция («Main Board»)  – 10,7 млрд. сўмлик 181 та битим;

музокара аукциони тарзидаги секция («Nego Board») - 5,5 млн. АҚШ долларилик 8 та битим (савдо кунидаги Марказий банк курси бўйича 16,9 млрд. сўм);

жисмоний шахслар учун клирингсиз битимлар тузиш имкониятини берувчи секция («NC Board») – 0,1 млрд. сўмлик 11 та битим.

Энг йирик битим 31 октябр санасида музокара аукциони тарзидаги секцияда («Nego Board») хорижий валютада «To'ytepa metall qurilmalari» АЖнинг 182,6 минг дона акцияси билан 1,9 млн. АҚШ доллари миқдорида тузилди (савдо кунидаги Марказий банк курси бўйича 5,8 млрд. сўм).

Муҳим кўрсаткичлардан бири ҳисобланган қимматли қоғозларнинг ликвидлилик коэффициенти октябр ойида умумий ҳолда 3,94 пунктни ташкил этди. Ҳисобот даврида қимматли қоғозлар билан тузилган умумий биржа битимларининг 47% номинал қийматидан юқори нархда амалга оширилган.

Таҳлилларга кўра, октябр ойида инвестор сифатида жисмоний ва юридик шахсларнинг саноат тармоғи (61,3%), агросаноат мажмуасига (19,5%) кирувчи жамиятлар ҳамда тижорат банкларининг (14,1%) қимматли қоғозларига бўлган қизиқиши юқорилиги кузатилди. Ўтган ойда инвесторлар тоифасига кўра биржа савдоларида юридик шахслар фаоллиги кузатилиб, тузилган умумий битимлар ҳажмининг – 92,7%, тузилган умумий битимлар сонининг эса – 53,5% айнан юридик шахслар иштирокида амалга оширилди.