2016 йилнинг 10 ойи давомида фонд биржаси савдо айланмасининг умумий ҳажми сўнгги беш йилнинг шу даврига нисбатан энг юқори кўрсаткични - 198,1 млрд. сўмни ташкил қилди ва ўтган йилнинг шу даврига (115,1 млрд. сўм) нисбатан 1,7 мартага ошди. 

Ушбу даврда фонд биржасида қимматли қоғозлар билан амалга оширилган битимлар сонида ҳам ўсиш кузатилиб, 2393 тани ташкил этди ва ўтган йилнинг шу даврига нисбатан 1,2 марта (1982 та битим)) юқори натижа қайд этилди. Йил бошидан буён биржа савдолари орқали 114 та акциядорлик жамиятининг 575,4 млн. дона қимматли қоғозлари билан биржа битимлари амалга оширилди.

Ўтган 10 ой мобайнида умумий биржа савдо айланмасида молиявий тармоқнинг улуши 50,1 фоизни ёки 99,2 млрд. сўмни ташкил қилган ҳолда, шундан 49,3 фоизи ёки 97,6 млрд. сўмлик қисми тижорат банкларининг қимматли қоғозлари билан амалга оширилган битимлардан иборат бўлди.

Шунингдек, ўтган даврда саноат (30,6 млрд. сўм), агросаноат мажмуаси (14,8 млрд. сўм) ва қурилиш материаллари (1,8 млрд. сўм) тармоғига кирувчи акциядорлик жамиятларининг қимматли қоғозлари билан амалга оширилган битимлар ҳиссаси ошгани кузатилди.

Бундан ташқари, фонд биржасининг ўтган 10 ойлик умумий савдо айланмаси таркиби инвесторлар тоифасига кўра таҳлил қилинганда, тузилган битимлар умумий ҳажмининг 80,3 фоизини (159,1 млрд. сўм) юридик шахсларнинг инвестициялари ташкил этганлигини кўришимиз мумкин. Шундан 44,6 фоизи ёки 71,0 млрд. сўмлиги хорижий инвесторлар ҳиссасига тўғри келади. Жисмоний шахсларнинг умумий биржа савдо айланмасидаги улуши эса 19,7 фоиз ёки 39,0 млрд. сўмни ташкил этди. (2015 йилнинг 10 ойида жисмоний шахсларнинг инвесторлар таркибидаги улуши 16,4 фоизи ёки 18,8 млрд. сўмни ташкил этган).

Бундан ташқари, жорий йилнинг ўтган ўн ойи мобайнида биржа листинг комиссияси хулосаси асосида 81 та янги акциядорлик жамиятларининг қимматли қоғозлари биржа котировкалаш варағига киритилди ҳамда 64 та жамиятга нисбатан делистинг тартиби қўлланилди. Натижада 2016 йилнинг 31 октябрь ҳолатига биржа котировкалаш варағидан жой олган жамиятларнинг умумий сони 278 тани ташкил этмоқда (2015 йил 31 октябрь ҳолатига – 236 тани ташкил этган).

Биржа котировкалаш варағидаги акциядорлик жамиятларнинг 24 таси “А” тоифа, 29 таси “В” тоифа, 190 таси “С” тоифа ҳамда 35 та жамият “Р” тоифага мансубдир.