2016 йилнинг ўтган 9 ойи мобайнида фонд биржаси савдо айланмасининг умумий ҳажмида сезиларли ўсиш кузатилиб, йил бошидан буён биржа савдо айланмаси 170,4 млрд. сўмни ташкил қилди ва 2015 йилнинг шу даврига (113,5 млрд. сўм) нисбатан 1,5 мартага ошди. Ўтган даврда биржа савдолари орқали 95 та акциядорлик жамиятининг 222,8 млн. дона қимматли қоғозлари билан биржа битимлари амалга оширилди.

Шунингдек, ўтган тўққиз ой мобайнида фонд биржасида қимматли қоғозлар билан амалга оширилган битимлар сони 2193 тани ташкил этиб, 2015 йилнинг тўққиз ойига нисбатан 1,2 марта (1844 та битим) юқори натижа қайд этилди.

Фонд биржаси фаолиятининг жорий йил тўққиз ойлик савдо айланмаси таҳлили иқтисодиётнинг молиявий тармоғи компанияларининг қимматли қоғозлари юқори инвестицион жозибадорлик касб этганини кўрсатди. Ушбу тармоқнинг умумий савдо айланмасидаги улуши 55,7 фоизни ёки 94,9 млрд. сўмни ташкил этган ҳолда, унинг энг кўп қисми, яъни 55,0 фоизлик ёки 93,8 млрд. сўмлик савдо айланмаси тижорат банкларининг қимматли қоғозлари билан амалга оширилган битимлар ҳиссасига тўғри келди. Қайд этиш лозимки, 2015 йилнинг 9 ойлигида молия тармоғининг биржа умумий савдо айланмасидаги улуши 85,2 фоиз ёки 96,8 млрд. сўмдан ибороат бўлган эди.

Шунингдек, ўтган даврда саноат тармоғига кирувчи акциядорлик жамиятларининг қимматли қоғозлари билан амалга оширилган битимлар ҳиссаси ошган ҳолда уларнинг умумий биржа савдо айланмасидаги улуши йил бошидан буён 8,0 фоиз ёки 13,7 млрд. сўмни ташкил қилди. Ўтган йилнинг мазкур даврида эса саноат тармоғининг улуши атиги 0,2 фоизни ёки 1,5 млрд. сўмни ташкил этган эди.

Бундан ташқари, ўтган давр мобайнида биржа савдоларида агросаноат мажмуаси (9,4 млрд. сўм) ва қурилиш материаллари тармоғига (1,8 млрд. сўм) кирувчи жамиятлар қимматли қоғозларига бўлган қизиқиш ҳам сақланиб қолмоқда.

Фонд биржасининг 9 ойлик умумий савдо айланмаси таркиби инвесторлар тоифасига кўра таҳлил қилинганда, тузилган битимлар умумий ҳажмининг 78,3 фоизини (133,5 млрд. сўм) юридик шахсларнинг инвестициялари ташкил этганлигини кўришимиз мумкин. Шундан 32,7 фоизи ёки 54,1 млрд. сўмлиги хорижий инвесторлар ҳиссасига тўғри келади.

Шунингдек, ҳисобот даврида биржа савдоларида жисмоний шахслар иштироки сезиларли даражада фаоллашиб, уларнинг улуши 21,7 фоиз ёки 37,0 млрд. сўмни, хорижий жисмоний шахслар томонидан биржа савдолари орқали қимматли қоғозларга киритилган инвестициялар умумий ҳажми эса 11,4 млрд. сўмни (6,7 фоиз) ташкил этди. 2015 йилнинг 9 ойлик якунлари бўйича эса умумий савдо айланмасида жисмоний шахсларнинг улуши 16,4 фоизни ёки 18,6 млрд. сўмни ташкил этган.

Фонд биржаси фаолиятининг устувор йўналишларидан бири молиявий барқарор жамиятларнинг қимматли қоғозларини янада кўпроқ биржа савдоларига жалб қилиш, уларга қулай ва кам харажатли биржа операциялари орқали инвестиция маблағларини йўналтириш ҳисобланади.

Агар 2011 йил 30 сентябр ҳолатида биржа листингига кирган жамиятлар сони 100 тани ташкил қилган бўлса, сўнгги беш йилда уларнинг сони деярли уч бараварга ошиб жорий йилнинг 30 сентябр ҳолатига кўра, биржа котировкалаш варағига кирган акциядорлик жамиятлари 295 тага етди (2015 йилнинг шу даврида - 178 та эди). Шундан, 79 та акциядорлик жамияти жорий йилнинг 9 ойи давомида биржа котировкалаш варағига киритилиши таъминланди.