Ipoteka obligatsiyalari bo‘yicha ikkinchi birja bitimi amalga oshirildi
31.07.2026
O‘zbekiston Respublikasi Prezidentining 2025-yil 21-fevraldagi PF–26-sonli "Uy-joy va ipoteka bozorini yanada rivojlantirishga oid qo‘shimcha chora-tadbirlar to‘g‘risida"gi Farmoni ijrosi doirasida "O‘zbekiston Ipotekani qayta moliyalashtirish kompaniyasi" AJ huzuridagi "UMRC SPV" MCHJ tomonidan chiqarilgan ipoteka obligatsiyalari bo‘yicha navbatdagi birja bitimi amalga oshirildi.
Bugun "Toshkent" Respublika fond birjasida mazkur emissiya doirasida 40,14 mlrd so‘mlik ipoteka obligatsiyalari bo‘yicha AT "Agrobank" ishtirokida yopiq obuna orqali bitim tuzildi.
Mazkur bitim Prezident Farmonida nazarda tutilgan ipoteka obligatsiyalarini bosqichma-bosqich joylashtirish mexanizmining amaliy ijrosi izchil davom etayotganini tasdiqlaydi.
Ipoteka obligatsiyalarining bosqichma-bosqich joylashtirilishi kapital bozorida ipoteka bilan ta’minlangan qimmatli qog‘ozlar segmentini rivojlantirish, uzoq muddatli moliyalashtirish manbalarini kengaytirish hamda ipoteka bozorida zamonaviy moliyaviy mexanizmlarni joriy etishga xizmat qiladi.