Toshkent Respublika fond birjasida Yevropa tiklanish va taraqqiyot banki (YETTB) vakillari bilan uchrashuv bo‘lib o‘tdi.

Uchrashuv davomida tomonlar O‘zbekiston kapital bozorining bugungi holati va rivojlanish istiqbollari yuzasidan fikr almashdilar. YETTB vakillariga Birjaning amaldagi savdo platformasi, fond bozori infratuzilmasi, qonunchilik bazasi hamda nizolarni hal etish mexanizmlari, jumladan arbitraj tizimi haqida batafsil ma’lumot berildi.

Muloqot chog‘ida YETTB tomoni milliy kapital bozoridagi korporativ obligatsiyalar segmentiga alohida qiziqish bildirib, mazkur yo‘nalishdagi imkoniyatlarni o‘rganishga tayyor ekanligini ta’kidladi.

Uchrashuv yakunida tomonlar kapital bozorini yanada rivojlantirish, investitsiya muhitini yaxshilash va yangi hamkorlik loyihalarini amalga oshirish bo‘yicha o‘zaro hamkorlikni kengaytirishga kelishib oldilar.