“Toshkent” Respublika fond birjasi Osiyo taraqqiyot banki (OTB) tomonidan tashkil etilgan “Kapital bozorini rivojlantirish va isloh qilishni qo‘llab-quvvatlash” mavzusidagi xalqaro konferensiyada ishtirok etdi.

Toshkent shahrida o‘tkazilgan mazkur ikki kunlik tadbir kapital bozorini rivojlantirish va moliya sektori infratuzilmasini takomillashtirish masalalariga bag‘ishlandi. 

Konferensiya doirasida milliy valyutadagi obligatsiyalar bozorini rivojlantirish, normativ-huquqiy bazani takomillashtirish, shuningdek investorlar va emitentlar doirasini kengaytirishga oid masalalar atroflicha muhokama qilindi.

Shuningdek, quyidagi yo‘nalishlar bo‘yicha fikr almashildi:

• milliy obligatsiyalar bozoridagi mavjud muammolar va ularni bartaraf etish bo‘yicha takliflar;
• kapital bozorida amalga oshirilayotgan islohotlar;
• kastodian banklar institutini rivojlantirish hamda hisob-kitob tizimlarini takomillashtirish;
• xorijiy investitsiyalarni jalb qilish va bozor shaffofligini oshirish;
• investitsiyalarni jalb etish orqali qimmatli qog‘ozlar chiqarilishini kengaytirish.

Tadbir davomida, shuningdek, barqaror rivojlanish obligatsiyalari, muvofiqlik sertifikatlari hamda aholining moliyaviy savodxonligini oshirish masalalariga alohida e’tibor qaratildi.