2016 йилнинг 6 - 10 июнь кунлари «Ташкент» Республика фонд биржаси савдоларида 10 та акциядорлик жамиятининг қимматли қоғозлари билан 31 та битим қайд қилиниб, 12 млн. дона акция 7,1 млрд. сўмга сотилди.

Ҳафта якунлари бўйича умумий савдо айланмасида қимматли қоғозлар иккиламчи бозорининг улуши юқорилиги кузатилиб, 63,4 фоиз, бирламчи бозор ҳиссаси эса 36,6 фоизни ташкил этди.

Энг йирик битим 10 июнь санасида блок-трейдинг савдо майдончасида хорижий валютада «Koson yog'-ekstraksiya» АЖнинг 881,9 минг дона акцияси билан 301 минг АҚШ доллари (МБ курси бўйича 1,0 млрд. сўм) миқдорида тузилди.

Ўтган ҳафта фонд биржасида республикамизнинг 6 та ҳудудида жойлашган листинг компаниялари қимматли қоғозлари билан савдо битимлари имзоланди. Биржа битимларининг энг юқори ҳажми Тошкент (84,1 фоиз) ва Қашқадарё вилоятларидаги (14,3 фоиз) акциядорлик жамиятлари ҳисобига тўғри келди.

Фонд биржасида йил бошидан буён 111,6 млрд. сўмлик 1743 та савдо битими қайд қилинди. Ушбу даврда биржа савдоларида 75 та эмитентнинг 86,2 млн. дона қимматли қоғозлари сотилган.

Умумий биржа савдо айланмасида қимматли қоғозлар иккиламчи бозорининг улуши 51,7 фоизни ёки 57,6 млрд. сўмни ташкил этди. Бирламчи бозор улуши эса 48,3 фоиздан иборат бўлди. Йил бошидан буён биржа савдо айланмасида тижорат банкларининг қимматли қоғозлари билан амалга оширилган битимлар ҳажми юқорилигича қолмоқда. Тижорат банкларининг умумий савдо айланмасидаги улуши 61,4 фоиз ёки 68,5 млрд. сўмни ташкил қилади.