18–19 iyun kunlari Qozog‘istonda bo‘lib o‘tgan XXII Cbonds Yevroosiyo kapital bozorlari forumi Yevroosiyo mintaqasining yetakchi fond birjalari, regulyatorlari, investitsiya banklari, va moliya institutlari vakillarini bir maydonga jamladi.

Forum kapital bozorlari infratuzilmasi, investitsiya imkoniyatlari va moliyaviy bozorlardagi yangi tendensiyalarni muhokama qilish uchun muhim xalqaro platforma bo‘ldi.

Forumning "Mahalliy kapital bozorlari: emitentlar va joylashtirish tashkilotchilari nigohida" panel sessiyasida "Toshkent" Respublika fond birjasi Tashqi aloqalar bo‘limi rahbari Artyom Tyan O‘zbekiston fond bozori infratuzilmasini modernizatsiya qilish bo‘yicha amalga oshirilayotgan islohotlar va istiqboldagi ustuvor yo‘nalishlarni taqdim etdi.

"Biz investorlar va emitentlarning ehtiyojlarini yaxshi tushunamiz. Maqsadimiz — nafaqat ularga moslashish, balki ayrim yo‘nalishlarda ularni oldindan ilg‘ab, kapital bozorining barqaror rivojlanishini ta’minlashdir. Shu maqsadda Birjada zamonaviy savdo platformasini joriy etish, bozorning real holatini yanada aniq aks ettiradigan birja indeksini shakllantirish hamda yangi rasmiy veb-saytni ishga tushirish ustida izchil ish olib bormoqdamiz.
Bugun O‘zbekiston kapital bozori yangi bosqichga qadam qo‘ymoqda. Bozor likvidligi oshib bormoqda, xalqaro investorlarning qiziqishi ortmoqda, xorijiy moliyaviy instrumentlar va birja investitsiya fondlari (ETF)ni joriy etish bo‘yicha yaratilayotgan yangi imkoniyatlar esa bozorimizning jozibadorligini yanada oshiradi."

Taqdimot forum ishtirokchilarida katta qiziqish uyg‘otdi. Xalqaro ekspertlar va bozor ishtirokchilari O‘zbekiston kapital bozori infratuzilmasini modernizatsiya qilish bo‘yicha amalga oshirilayotgan islohotlar, bozor likvidligining oshishi hamda yangi moliyaviy instrumentlarni joriy etish tashabbuslariga alohida e’tibor qaratdi.

Forum yakunlariga ko‘ra, O‘zbekiston kapital bozori xalqaro professional hamjamiyat tomonidan mintaqadagi eng istiqbolli va jadal rivojlanayotgan bozorlardan biri sifatida e’tirof etilayotgani yana bir bor tasdiqlandi.