2024-yilning 16-aprel kuni “Toshkent” Respublika fond birjasida (RFB) Boku fond birjasi Kuzatuv kengashi raisi Farid Oxundov boshchiligidagi delegatsiya bilan uchrashuv bo‘lib o‘tdi.

Tashrifdan ko‘zlangan asosiy maqsad Boku birjasi boshqaruvining yangi raisi Ruslan Xalilov bilan aloqa o‘rnatish va ikki birja o‘rtasidagi hamkorlikni chuqurlashtirishdan iborat edi. Uchrashuvda “Toshkent” RFB Boshqaruv raisi Georgiy Paresishvili O‘zbekiston kapital bozorining bugungi holati bilan tanishtirdi va uni rivojlantirish rejalarini muhokama qildi. Savdo tizimi masalalari, shu jumladan, Boku fond birjasining yangi savdo maydonchasiga o‘tish tajribasi bo‘yicha tajriba almashish muhim jihat bo‘ldi.

Boku fond birjasi vakillari O‘zbekistonning xorijiy investorlar uchun mahalliy fond bozoriga yo‘l ochish borasidagi sa’y-harakatlarini ijobiy baholadilar va Prezidentning ushbu yo‘nalishda yangi imkoniyatlarni nazarda tutuvchi PQ-291-sonli qarori bilan tanishdilar.

Uchrashuvda tomonlar tajriba va axborot almashishni yuqori baholadilar hamda O‘zbekiston va Ozarbayjonda mahalliy kapital bozori infratuzilmasini yaxshilashga qaratilgan qo‘shma tashabbuslarni muhokama qildilar.