“Toshkent” Respublika fond birjasida Markaziy va Sharqiy Yevropaning yetakchi investitsiya banklaridan biri — WOOD & Company boshchiligidagi xalqaro investitsiya institutlari delegatsiyasi bilan uchrashuv o‘tkazildi.

Delegatsiya tarkibida Morgan Stanley Investment Management, Lazard, Artisan Partners LP, Wexford Capital, Prospe Capital Management hamda boshqa qator xalqaro investitsiya kompaniyalari vakillari ishtirok etdi.

Uchrashuv davomida O‘zbekiston fond bozori rivojlanishining bugungi holati va istiqbollari, xorijiy institutsional investorlar ishtirokini kengaytirish hamda xalqaro kapitalni jalb etish masalalari muhokama qilindi.

Tomonlar xorijiy investorlarning fond bozoridagi joriy faolligi, investorlarni bozorga jalb qilish va ro‘yxatdan o‘tkazish jarayonlari, kapital repatriatsiyasi va valyuta konvertatsiyasi amaliyoti yuzasidan fikr almashdilar.

Shuningdek, bozor infratuzilmasini rivojlantirish, hisob-kitob amaliyotlarini takomillashtirish, global kastodianlar bilan hamkorlikni kengaytirish, shuningdek, institutsional investorlar uchun qulay va raqobatbardosh investitsiya muhitini shakllantirish masalalariga alohida e’tibor qaratildi.

Shu bilan birga, 2026–2028-yillarga mo‘ljallangan strategik ustuvor yo‘nalishlar, xorijiy investorlar bazasini kengaytirish, institutsional kapital oqimini ko‘paytirish, raqamli transformatsiya va bozor shaffofligini oshirish bo‘yicha amalga oshirilayotgan tashabbuslar muhokama qilindi.

Tomonlar O‘zbekiston fond bozorining investitsion jozibadorligini yanada oshirish, xalqaro investorlar ishtirokini kengaytirish va uzoq muddatli hamkorlikni rivojlantirish yuzasidan muloqotni davom ettirishga kelishib oldilar.