2018 йилнинг 4 – 8 июнь кунлари  «Тошкент» Республика фонд биржаси савдоларида 31 та акциядорлик жамиятининг акциялари билан 330 та битим қайд қилиниб, 60,5 млн. дона оддий ва 37,2 минг дона имтиёзли акциялар      12,2 млрд. сўмга сотилди.

Ҳафталик савдо айланмасини ўтган ҳафта якунлари (28 май – 1 июн кунлари) билан қиёслаганда кўриб чиқилаётган даврда савдо ҳажми 1,5 млрд. сўмга (114 фоизга) ортганлигини кузатишимиз мумкин. Қимматли қоғозлар билан ўртача кунлик савдо айланмаси ҳисобот даврида 2,5 млрд. сўмни (олдинги ҳафтада - 2,1 млрд. сўм), ўртача битим қиймати эса 37,0 млн. сўмни (олдинги ҳафтада 59,0 млн. сўм) ташкил этди. Шу билан бирга, ушбу даврда сотилган бир дона акциянинг ўртача нарх кўрсаткичи 201,7 сўмдан (олдинги ҳафтада - 343,2 сўм),  ўртача кунлик инвесторларга сотилган акциялар сони эса 12,1 млн. донадан иборат бўлди. 

Таҳлиллар жами савдо айланмасининг 25,6 фоизи тижорат банклари ҳамда 13,1 фоизи саноат тармоғига кирувчи акциядорлик жамиятларининг қимматли қоғозлари билан амалга оширилган битимлардан иборат бўлганини кўрсатди.

Энг йирик битим 5 июнь санасида музокаралар аукциони тарзидаги «Nego Board»  секциясида “Janubsanoatmontaj” АЖ нинг 334,7 минг дона акцияси билан 3,3 млрд. сўм миқдорида тузилди. Бир дона акциянинг сотув нархи 9 846,45  сўмни ёки номинал нархига нисбатан 9,8 марта юыори қийматни ташкил қилди.

Битимлар сони бўйича етакчиликни ўтган ҳафтада “Kvarts” AЖ эгаллаган ҳолда,  унинг 24,4  минг дона акцияси билан 114,0 млн. сўмлик 142 та битим амалга оширилди. Ундан кейинги ўринларни эса “Qizilqumsement” АЖ (52 та битим) ва АТ “Aloqabank” (27 та битим) эгаллади.

Ҳафта давомида савдо айланмаси ҳажми юқори бўлган эмитентларни “Janubsanoatmontaj” АЖ (ҳафталик савдо айланмасининг – 42,1 фоизи ёки 5,14 млрд. сўм), “ANGREN PACK” ХС АЖ (17,7 фоиз ёки 2,15 млрд. сўм), “Kapitalbank” АТБ (17,2 % ёки 2,10 млрд. сўм) “O'ZBEKKIMYOMASH ZAVODI” АЖ (13,0 % ёки 1,59 млрд. сўм) ташкил этган ҳолда, савдо айланмасининг 90,0 фоизи (11,0 млрд. сўм) улар ҳиссасига тўғри келди.

Ўтган ҳафтада инвесторлар тоифасига кўра биржа савдоларида           жисмоний шахслар фаоллиги кузатилиб, тузилган умумий битимлар            ҳажмининг – 47,7 фоизи (5,82 млрд. сўм), битимлар сони бўйича эса – 89,7 фоизи (296 дона) айнан улар ҳиссасига тўғри келди.

Шунингдек, ўтган ҳафтада фонд биржасида республикамизнинг 6 та ҳудудида жойлашган листинг компаниялари қимматли қоғозлари билан савдо битимлари имзоланди. Биржа битимларининг энг юқори ҳажми Навоий (42,6) ва Тошкент вилоятлари (30,7 фоиз) ҳамда Тошкент шаҳридаги (25,7 фоиз) акциядорлик жамиятлари ҳисобига тўғри келди.

Фонд биржасида йил бошидан буён 147,3 млрд. сўмлик 5 640 та савдо битими қайд қилинди. Ушбу даврда биржа савдоларида 81 та акциядорлик жамиятининг 3,57 млрд. дона қимматли қоғозлари сотилган.

Йил бошидан буён биржа савдо айланмасида тижорат банкларининг қимматли қоғозлари билан амалга оширилган битимлар ҳажми юқорилигича қолмоқда. Уларнинг умумий савдо айланмасидаги улуши 64,3 фоиз ёки 94,7 млрд. сўмни ташкил этади.