2017 йилнинг 27 ноябр – 1 декабр кунлари «Тошкент» Республика фонд биржаси савдоларида 15 та акциядорлик жамиятининг қимматли қоғозлари билан 82 та битим қайд қилиниб, 55,6 млн. дона акция 148,5 млрд. сўмга сотилди. Ушбу кўрсаткич ўтган ҳафта савдо якунларига нисбатан 4,2 маротабага кўпдир.

Таҳлиллар жами савдо айланмасининг 99,9 фоизи тижорат банкларнинг қимматли қоғозлари билан амалга оширилган битимлардан иборат бўлганини кўрсатди. Энг йирик битимлар 30 ноябрь санасида «UTBank»  АЖнинг 20,4 млн. дона акцияси билан 14,0 млн. АҚШ доллари (МБнинг савдо кунидаги курси бўйича 113,3 млрд. сўм) миқдорида тузилди.

Шунингдек, тузилган битимлар сони бўйича етакчиликни «Trastbank» ХАБ эгаллаган ҳолда, ҳафта давомида ушбу банкнинг 25,3 млн. дона акциялари билан 33,5 млрд. сўмлик 45 та битим амалга оширилди.

Ҳафта давомида савдо айланмаси ҳажми юқори бўлган эмитентларни  «UTBank»  АЖ (ҳафталик савдо айланмасининг – 76,3 фоизи) ва ««Trastbank» ХАБ (22,6 фоизи) ташкил этди. Бу ҳафталик савдо айланмасининг 98,9 фоизини ташкил этади.

Ўтган ҳафта фонд биржасида республикамизнинг 5 та ҳудудида жойлашган листинг компаниялари қимматли қоғозлари билан савдо битимлари имзоланди. Биржа битимларининг энг юқори ҳажми Тошкент шаҳридаги (99,99 фоиз) акциядорлик жамиятлари ҳисобига тўғри келди.

Қимматли қоғозларнинг номинал нархига нисбатан юқори даражадаги фарқ қуйидаги акциядорлик жамиятларининг акциялари билан тузилган савдо битимларида кузатилди:

1. «JIZZAXDONMAHSULOTLARI» АЖ. Нисбат – 54:1. Ушбу акциядорлик жамияти бир дона акциясининг савдо кунидаги биржа нархи 5400 сўмдан иборат бўлди. Акциянинг номинал қиймати эса 100 сўмни ташкил қилади.

2. SHIFOBAXSH BULOQ» АЖ. Нисбат – 53,55:1. Ушбу эмитент бир дона акциясининг савдо кунидаги биржа нархи 40000 сўмдан иборат бўлди. Акциянинг номинал қиймати 747 сўмни ташкил қилади.

Шунингдек, ўтган ҳафтада инвесторлар тоифасига кўра биржа савдоларида юридик шахслар фаоллиги кузатилиб, тузилган умумий битимлар ҳажмининг – 83,3 фоизи айнан улар ҳиссасига тўғри келди, умумий битимлар сонининг 86,6 фоизи эса жисмоний шахслар томонидан тузилган.

Таҳлилларга кўра, фонд биржасида йил бошидан буён 260,7 млрд. сўмлик 2337 та савдо битими қайд қилинди. Ушбу даврда биржа савдоларида 93 та эмитентнинг 1,4 млрд. дона қимматли қоғозлари сотилган.

Ўктам ОЧИЛОВ, 

«Тошкент» РФБнинг Таҳлилий хизмат бошлиғи