Жорий йилнинг 10-14 июль кунлари “Тошкент” республика фонд биржаси савдоларида 11 та акциядорлик жамиятининг қимматли қоғозлари билан 43 та битим қайд қилиниб, 2,5 млн. дона акция 208,4 млн. сўмга сотилди. Таҳлиллар жами савдо айланмасининг 53,6 фоизи тижорат банкларининг қимматли қоғозлари билан амалга оширилган битимлардан иборат бўлганини кўрсатди. Энг йирик битим 10 июль санасида “O'zsanoatqurilishbank” АТБнинг 32,5 минг дона акцияси билан 110,0 млн. сўм миқдорида тузилди.

Тузилган битимлар сони бўйича етакчиликни “Marg'ilon Fayz savdo kompleksi” акциядорлик жамияти эгаллади, унинг 16,1 минг дона акциялари билан 19,0 млн. сўмлик 16 та битим амалга оширилди.

Ҳафта давомида савдо айланмаси ҳажми юқори бўлган эмитентларни “O'zsanoatqurilishbank” АТБ (ҳафталик савдо айланмасининг – 52,9 фоизи), “Olchazor aziya” АЖ (21,6 фоиз), “Marg'ilon Fayz savdo kompleksi” АЖ (9,2 фоиз), “Amubuxorokanalqurilish” АЖ (5,4 фоиз) ва “TOSHKENTVINO KOMBINATI” АЖ (4,7 фоиз) ташкил этди. Савдо айланмасининг 93,8 фоизи улар ҳиссасига тўғри келди.

Республикамизнинг 4 та ҳудудида жойлашган листинг компаниялари қимматли қоғозлари билан савдо битимлари имзоланди. Биржа битимларининг энг юқори ҳажми Тошкент шаҳридаги (84,2 фоиз) акциядорлик жамиятлари ҳисобига бўлди.

Қимматли қоғозларнинг номинал нархига нисбатан юқори даражадаги фарқ қуйидаги акциядорлик жамиятларининг акциялари билан тузилган савдо битимларида кузатилди:

- “SHIFOBAXSH BULOQ” акциядорлик жамияти бир дона акциясининг савдо кунидаги биржа нархи 40 000 сўмга етди. Акциянинг номинал қиймати эса 747 сўмдан иборат.

- “TOSHKENTVINO KOMBINATI” акциядорлик жамияти бир дона акциясининг номинал қиймати 4 000 сўм, савдо кунидаги биржа нархи 25 000 сўмни ташкил этди.

Ўтган ҳафтада инвесторлар тоифасига кўра, биржа савдоларида юридик шахслар фаоллиги кузатилиб, тузилган умумий битимлар ҳажмининг 52,7 фоизи улар ҳиссасига тўғри келди. Тузилган битимлар сони бўйича эса жисмоний шахслар пешқадамлиги кузатилди (97,6 фоиз).

Фонд биржасида йил бошидан буён 43,7 млрд. сўмлик 1425 та савдо битими қайд қилинди. Ушбу даврда биржа савдоларида 75 та эмитентнинг 1,2 млрд. дона қимматли қоғозлари сотилди.

Ўктам ОЧИЛОВ,

“Тошкент” РФБнинг Таҳлилий хизмат бошлиғи.