Жорий йилнинг 26-30 июнь кунлари “Тошкент” республика фонд биржаси савдоларида 8 та акциядорлик жамиятининг қимматли қоғозлари билан 39 та битим қайд қилиниб, 2,3 млн. дона акция 596,5  млн. сўмга сотилди. Таҳлиллар жами савдо айланмасининг 97,7 фоизи тижорат банкларининг қимматли қоғозлари билан амалга оширилган битимлардан иборат бўлганини кўрсатди. Энг йирик битим 28 июнь санасида “Ravnaq-bank” ХАТБнинг 400 минг  дона акцияси билан 400,0 млн. сўм миқдорида тузилди.

Бундан ташқари, тузилган битимлар сони бўйича етакчиликни “Hamkorbank” АТБ эгаллади. Унинг   229,4 минг дона акцияси билан 35,5 млн. сўмлик 13 та битим амалга оширилди.

Шундай қилиб, ҳафта давомида савдо айланмаси ҳажми юқори бўлган эмитентларни “Ravnaq-bank” ХАТБ (ҳафталик савдо айланмасининг – 67,1 фоизи), “O'zsanoatqurilishbank”  АТБ (24,5 фоиз), “Hamkorbank” АТБ (6,0 фоиз), шунингдек,  “Olchazor aziya” АЖ (1,9 фоиз) ва “Toshkent univermagi” АЖ (1,0 фоиз) ташкил этди. Ҳафталик савдо айланмасининг 99,7 фоизи улар ҳиссасига тўғри келди.

Республикамизнинг 4 та ҳудудида жойлашган листинг компаниялари қимматли қоғозлари билан ҳам савдо битимлари имзоланди. Биржа битимларининг энг юқори ҳажми Тошкент шаҳридаги (93,9 фоиз) акциядорлик жамиятлари улушидан иборат бўлди.

Қимматли қоғозларнинг номинал нархига нисбатан юқори даражадаги фарқ қуйидаги акциядорлик жамиятларининг акциялари билан тузилган савдо битимларида кузатилди:

- “Toshkent univermagi”  акциядорлик жамияти бир дона акциясининг савдо кунидаги биржа нархи 15 000 сўмдан иборат бўлди. Акциянинг номинал қиймати эса 1 552 сўм.

- “Olchazor aziya” акциядорлик жамияти  бир дона акцияси  номинал қиймати 5 000 сўм бўлиб, унинг савдо кунидаги биржа нархи 30 000 сўмга кўтарилди.

Ўтган ҳафтада инвесторлар тоифасига кўра биржа савдоларида жисмоний шахслар фаоллиги кузатилиб, тузилган умумий битимлар ҳажмининг  75,4 фоизи айнан улар ҳиссасига тўғри келди. Таҳлилларга қараганда  инвестор сифатида жисмоний шахслар энг кўп тижорат банклари акцияларига юқори қизиқиш билдиришган (97,3 фоиз).

Фонд биржасида йил бошидан буён 33,0 млрд. сўмлик 1351 та савдо битими қайд қилинди. Ушбу даврда биржа савдоларида 72 та эмитентнинг 1 064,6 млн. дона қимматли қоғози  сотилган.

Ўктам ОЧИЛОВ, 

“Тошкент” РФБнинг Таҳлилий хизмат бошлиғи.