Жорий йилнинг 14-18 август кунлари “Тошкент” республика фонд биржаси савдоларида 14 та акциядорлик жамиятининг қимматли қоғозлари билан 53 та битим қайд қилиниб, 1,5 млн. дона акция 1,8 млрд. сўмга сотилди. Таҳлиллар жами савдо айланмасининг 86,2 фоизи тижорат банкларининг, 9,5 фоизи транспорт тармоғидаги акциядорлик жамиятларининг қимматли қоғозлари билан амалга оширилган битимлардан иборат бўлганини кўрсатди.

Энг йирик битим 15 август санасида “Turkiston” ХАТБнинг 1,0 млн. дона акцияси билан 1,0 млрд. сўм миқдорида тузилди. Йил бошидан буён биржа савдоларида ушбу банкнинг 7,4 млн. дона акциялари билан 7,4 млрд. сўмлик 24 та савдо битими тузилган.

Шунингдек, тузилган битимлар сони бўйича етакчиликни “Granit”  акциядорлик жамияти эгаллаб,   ҳафта давомида ушбу жамиятнинг 17,2 минг дона акцияси билан 172,9 млн. сўмлик 17 та битим амалга оширилди.

Ҳафта давомида савдо айланмаси ҳажми юқори бўлган эмитентлар қаторидан “Universal bank” ХАТБ (11,4 фоиз) ҳам ўрин олди.

Республикамизнинг 6 та ҳудудида жойлашган листинг компаниялари қимматли қоғозлари билан ҳам  савдо битимлари имзоланди. Биржа битимларининг энг юқори ҳажми Тошкент шаҳри (75,2 фоиз), Фарғона (14,6 фоиз) ва Самарқанд (9,9 фоиз) вилоятларидаги акциядорлик жамиятлари ҳисобига тўғри келди.

Бундан ташқари, бу даврда  биржа савдоларида жисмоний шахслар фаоллиги кузатилиб, тузилган умумий битимлар ҳажмининг  94,1 фоизи айнан улар улушини ташкил этди. Таҳлилларга кўра, инвестор сифатида жисмоний шахслар энг кўп тижорат банклари акцияларига юқори қизиқиш билдиришган (85,5 фоиз).

Фонд биржасида йил бошидан буён 57,0 млрд. сўмлик 1620 та савдо битими қайд қилинди. Ушбу даврда биржа савдоларида 77 та эмитентнинг 1,2 млрд. дона қимматли қоғозлари сотилган.

Ўктам ОЧИЛОВ,

“Тошкент” РФБнинг Таҳлилий хизмат бошлиғи.